पार्थ पवारांना मोठा दिलासा, मुंढवा जमीन खरेदी प्रकरणात निर्दोष? खारगे समितीच्या अहवालात नेमकं काय?

खारगे समितीने आपल्या प्राथमिक अहवालात या जमीन व्यवहारात प्रमुख भूमिका बजावणाऱ्या ‘अमेडिया’ कंपनीचे संचालक दिग्विजय पाटील, कंपनीला जमीन विकणारी शीतल तेजवानी तसेच संबंधित नोंदणी अधिकाऱ्यांना दोषी ठरवले आहे. तसेच अमेडिया कंपनीकडून सुमारे 21 कोटी रुपयांचे मुद्रांक शुल्क वसूल करण्याची स्पष्ट शिफारसही अहवालात करण्यात आली आहे.

समितीची मुदत येत्या 6 तारखेला संपत असून, अंतिम अहवाल सादर करण्यासाठी आणखी एका आठवड्याची मुदतवाढ मागण्याचा निर्णय समितीने घेतला आहे. निवडणुका आणि महापौर निवडणुकीमुळे समितीचे सदस्य व्यस्त असल्याने अंतिम चर्चा आणि निर्णयासाठी शेवटची बैठक आवश्यक असल्याचे कारण यामागे देण्यात आले आहे.

नेमकं प्रकरण काय?

पुण्यातील मुंढवा-कोरेगाव पार्क परिसरातील सुमारे 40 एकर जमिनीच्या विक्रीवरून हे संपूर्ण प्रकरण उभे राहिले आहे. बाजारभावानुसार जवळपास 1800 कोटी रुपयांचे मूल्य असलेली ही जमीन अवघ्या 300 कोटी रुपयांना विकली गेल्याचा आरोप करण्यात आला असून, त्यामुळे मोठा वाद निर्माण झाला. ही जमीन काही महिन्यांपूर्वी पार्थ पवार यांची भागीदारी असलेल्या ‘अमेडिया’ कंपनीने खरेदी केली होती. मात्र नंतर झालेल्या या व्यवहारावर संशय व्यक्त करण्यात आला होता. या प्रकरणी बावधन पोलीस ठाण्यात गुन्हा दाखल करण्यात आला असला, तरी त्या एफआयआरमध्ये पार्थ पवार यांचे नाव नमूद करण्यात आलेले नव्हते.