“डिलीटेंद्र..”, नागपूरमध्ये काँग्रेसचा विजय होताच महाराष्ट्र काँग्रेसचं फडणवीसांना प्रत्युत्तर

हेही वाचा : नागपूर पदवीधर : शेवटच्या टप्प्यात काँग्रेसने गेम पलटवला, अन् सपकाळांनी फडणवीसांना डिवचलं

देवेंद्र फडणवीसांवर ट्वीट डिलीट करण्याची वेळ? 

देवेंद्र फडणवीस यांनी पंतप्रधान नरेंद्र मोदींचं ट्वीट शेअर करुन काँग्रेसवर टीका केली होती. या ट्वीटमध्ये उत्तर प्रदेश, महाराष्ट्र, बिहार आणि कर्नाटक या चार मोठ्या राज्यांतील 28 जागांवर विधान परिषद निवडणुका झाल्याचा उल्लेख होता. या निवडणुका मतपत्रिकेद्वारे झाल्याचंही त्यांनी नमूद करत काँग्रेसला किती जागा मिळाल्या? असा सवाल मोदींनी केला होता. त्यानंतर फडणवीसांनी काँग्रेसला उद्देशून “A big fat ZERO! At least Congress is consistent at something..” असं लिहिलं होतं. म्हणजेच, काँग्रेसला शून्य जागा मिळाल्याचा दावा करत त्यांनी पक्षावर टीका केली होती. मात्र, नागपूर विभाग पदवीधर मतदारसंघाचा निकाल जाहीर झाल्यानंतर काँग्रेसच्या अभिजित वंजारी यांनी विजय मिळवला. वंजारी यांना प्रथम आणि द्वितीय पसंतीक्रमाची मिळून एकूण 67 हजार 231 मते मिळाली. त्यांचे निकटचे प्रतिस्पर्धी भाजपचे सुधाकर कोहळे यांना 63 हजार 960 मते मिळाली. निवडणूक निर्णय अधिकारी तथा विभागीय आयुक्त विजयलक्ष्मी बिदरी यांनी अभिजित वंजारी यांना विजयाचे प्रमाणपत्र प्रदान केले.

हेही वाचा : पुणे शिक्षक मतदारसंघात भाजपने मारली मुसंडी, शिंदेंच्या उमेदवाराला चारली पराभवाची धूळ

या निकालानंतर महाराष्ट्र काँग्रेसने फडणवीसांच्या ट्वीटवरून त्यांच्यावर निशाणा साधला. “संपूर्ण निकाल हाती येण्याआधीच मोठा तीर मारल्याच्या आविर्भावात फडणवीसांनी ट्विट केलं. पण तोच तीर उलटला आणि थेट त्यांच्या छातीत घुसला! अखेर नामुष्की ओढवून घेत ट्विट डिलीट करण्याची वेळ आली,” असं काँग्रेसने म्हटलं. तसेच, “फडणवीसजी, एवढ्यातच घाबरलात?” असा सवालही उपस्थित केला. काँग्रेसने आपल्या ट्वीटमध्ये फडणवीसांना “डिलीटेंद्र” असं संबोधत टीका केली. नागपूरमध्ये काँग्रेसचा विजय झाल्यानंतर फडणवीसांचं ट्वीट हटवण्यात आल्याचा दावा करत पक्षाने या घडामोडीवरून राजकीय टोलेबाजी केली.

राष्ट्रवादी काँग्रेसचे आमदार रोहित पवार यांनीही या निकालावरून देवेंद्र फडणवीस यांना लक्ष्य केलं. “आपण स्वतः वैयक्तिक लक्ष घातलेल्या नागपूर पदवीधर मतदारसंघात, ज्या ठिकाणी आपण स्वतः घरोघरी जाऊन बंडखोरांना माघार घेण्यासाठी मनवले, त्याच नागपूर मतदारसंघात, संघाचे मुख्यालय असलेल्या भागात भाजपला पराभव बघावा लागला, याचा अर्थ स्पष्ट आहे,” असं रोहित पवार यांनी म्हटलं. पुढे त्यांनी फडणवीसांना ट्वीट हटवावं लागल्याचा उल्लेख करत सत्तेच्या अहंकारावर टीका केली. तसेच, निवडणूक मतपत्रिकेवर झाली होती, याचा विसर पडला असावा, असा टोलाही त्यांनी लगावला. दरम्यान, रोहित पवार यांनी विजयी उमेदवार अभिजित वंजारी यांचं अभिनंदन केलं आणि मतदान करणाऱ्या पदवीधरांचे आभार मानले. नागपूरच्या निकालानंतर काँग्रेस आणि राष्ट्रवादी काँग्रेसच्या नेत्यांनी फडणवीसांच्या ट्वीटवरून केलेल्या टीकेमुळे हा निकाल राजकीय चर्चेचा विषय ठरला आहे.