पवारांची साथ सोडल्यानंतर उद्धव ठाकरे अन् शिदेंची ऑफर, आता प्रशांत जगताप यांची पहिली प्रतिक्रिया समोर

Prashant Jagtap first reaction about Uddhav Thackeray and Eknath Shinde offer : पुणे महानगरपालिका निवडणुकीच्या पार्श्वभूमीवर दोन्ही राष्ट्रवादी काँग्रेस एकत्र येऊन लढण्याची शक्यता असल्याच्या चर्चा राजकीय वर्तुळात जोर धरू लागल्यानंतर आणि दोन्ही गटांमध्ये प्राथमिक पातळीवर बैठका सुरू झाल्याची माहिती समोर आली होती. दोन्ही राष्ट्रवादी एकत्र येण्यासाठी मोठ्या घडामोडी सुरु असताना राष्ट्रवादी काँग्रेस (शरदचंद्र पवार गट) पक्षाचे नेते प्रशांत जगताप यांनी पक्ष सोडण्याचा निर्णय घेतला. त्यांनी पक्षाच्या प्राथमिक तसेच सक्रिय सदस्यत्वाचा राजीनामा दिला. दरम्यान, प्रशांत जगतापांनी शरद पवारांची साथ सोडल्यानंतर काँग्रेसमध्ये प्रवेश करणार होते. मात्र, त्यापूर्वी मोठ्या घडामोडी पाहायला मिळाल्या. काँग्रेसप्रमाणेच शिवसेनेच्या दोन्ही गटांकडूनही जगताप यांना संपर्क करण्यात आल्याची माहिती समोर आली आहे. उद्धव ठाकरे यांनी त्यांना शिवसेना (ठाकरे गट) मध्ये येण्याची ऑफर दिल्याचे बोलले जात असतानाच, राज्याचे उपमुख्यमंत्री आणि शिवसेना प्रमुख नेते एकनाथ शिंदे यांनी देखील जगताप यांच्याशी फोनवरुन संपर्क साधल्याचे समोर आले आहे.