Personal Finance: Term Insurance घेताना 'या' 5 चुका टाळा; अन्यथा...

1. कमी विमा संरक्षण (Sum Assured) निवडणे

प्रीमियम कमी ठेवण्यासाठी अनेक जण कमी कव्हरची पॉलिसी घेतात. मात्र आकस्मिक मृत्यू झाल्यास हे संरक्षण कुटुंबाच्या गरजा भागवण्यासाठी अपुरे ठरू शकते. तज्ज्ञांच्या मते, विमा रक्कम ही किमान वार्षिक उत्पन्नाच्या 10 ते 15 पट, तर काही तज्ज्ञांच्या मते 15 ते 20 पट असावी. गृहकर्ज, मुलांचे शिक्षण आणि इतर आर्थिक जबाबदाऱ्या लक्षात घेऊन कव्हर ठरवणे आवश्यक आहे. 

2. कमी कालावधीची पॉलिसी घेणे

काही लोक प्रीमियम वाचवण्यासाठी 10-15 वर्षांच्या कालावधीची पॉलिसी घेतात. परंतु निवृत्तीपूर्वीच विमा संरक्षण संपल्यास भविष्यात मोठा धोका निर्माण होऊ शकतो. वय वाढल्यानंतर नवीन पॉलिसी घेणे महाग पडू शकते किंवा आरोग्याच्या कारणामुळे विमा नाकारला जाऊ शकतो. त्यामुळे आर्थिक जबाबदाऱ्या संपेपर्यंत पॉलिसी सुरू राहील असा कालावधी निवडणे अधिक सुरक्षित मानले जाते. 

3. टर्म इन्शुरन्स घेण्यास उशीर करणे

अनेकांना वाटते की टर्म इन्शुरन्स नंतरही घेता येईल. मात्र कमी वयात आणि चांगल्या आरोग्यस्थितीत घेतलेली पॉलिसी तुलनेने स्वस्त असते. वय वाढल्यावर प्रीमियम वाढतो आणि काही वेळा वैद्यकीय कारणांमुळे पॉलिसी मंजूर होण्यास अडचणी येऊ शकतात. त्यामुळे कमाई सुरू झाल्यानंतर लवकर टर्म इन्शुरन्स घेणे फायदेशीर ठरते. 

4. आरोग्य किंवा जीवनशैलीची माहिती लपवणे

कमी प्रीमियमसाठी काही लोक धूम्रपान, मद्यपान, मधुमेह, रक्तदाब किंवा इतर आजारांची माहिती विमा कंपनीपासून लपवतात. मात्र क्लेमच्या वेळी अशी माहिती उघड झाल्यास विमा दावा फेटाळला जाऊ शकतो. त्यामुळे अर्ज भरताना सर्व माहिती प्रामाणिकपणे देणे अत्यंत महत्त्वाचे आहे. 

5. गरज नसताना अतिरिक्त रायडर्स जोडणे

क्रिटिकल इलनेस, अपघाती मृत्यू लाभ यांसारखे रायडर्स अतिरिक्त संरक्षण देतात. मात्र त्यांची गरज न समजून अनेक जण सर्वच रायडर्स जोडतात आणि प्रीमियम वाढवतात. तज्ज्ञांच्या मते, स्वतःची जीवनशैली, आरोग्यस्थिती आणि आर्थिक गरज लक्षात घेऊनच रायडर्स निवडावेत. 

तज्ज्ञांचा सल्ला

टर्म इन्शुरन्स ही केवळ कर बचतीची योजना नसून कुटुंबाच्या आर्थिक भविष्यासाठीचे संरक्षण आहे. त्यामुळे फक्त स्वस्त प्रीमियम पाहून निर्णय घेण्याऐवजी कव्हरची रक्कम, पॉलिसीचा कालावधी, क्लेम सेटलमेंट रेशो आणि विमा कंपनीची विश्वासार्हता यांचा विचार करणे आवश्यक आहे.

आर्थिक नियोजन करणाऱ्यांच्या मते, योग्य वयात योग्य कव्हरसह घेतलेला टर्म इन्शुरन्स हा कुटुंबासाठी सर्वात मजबूत आर्थिक सुरक्षा कवच ठरू शकतो.