लोन वसूलीसाठी मुंबईतील रिकव्हरी एजंटचं घाणेरडं कृत्य! ग्राहकाच्या पत्नीचे फोटो मॉर्फ करून व्हायरल...

इंस्टाग्रामवर अश्लील आणि मॉर्फ फोटो व्हायरल...

मिळालेल्या माहितीनुसार, एका 31 वर्षीय रिअल इस्टेट व्यापाराने डिसेंबर 2024 मध्ये एका अॅपच्या माध्यमातून 1.5 लाख रुपयांचं कर्ज घेतलं होतं. मात्र, कुटुंबात आर्थिक समस्या असल्याकारणाने पीडित व्यक्ती कर्ज फेडू शकली नाही. 25 ऑक्टोबर रोजी प्रकरणातील आरोपी तुषारने पीडित व्यापाराला जर कर्ज फेडलं नाही तर त्याची आणि त्याच्या कुटुंबियांची बदनामी केली जाणार असल्याची धमकी दिली. त्यांनंतर, संबंधित व्यापाराच्या माहितीचा वापर करत आरोपीने इंस्टाग्रामवर एक बनावट अकाउंट तयार केलं आणि त्यावर पीडित व्यक्तीच्या पत्नीचे अश्लील आणि मॉर्फ केलेले फोटो पोस्ट केले. हे फोटो सोशल मीडियावर व्हायरल झाल्याने ते पीडितेच्या कुटुंबीय आणि ओळखीच्या लोकांपर्यंत पोहोचले, यामुळे कुटुंबियांवर प्रचंड मानसिक तणाव निर्माण झाला. 

हे ही वाचा: विकृतीचा कळस! मुंबईत 55 वर्षीय व्यक्तीकडून मांजरीवर बलात्कार, पोलिसांनी आरोपीला घरातून उचललं

आरोपीने केला गुन्हा कबूल 

अखेर, कुटुंबियांनी याबाबत पोलीस स्टेशनमध्ये तक्रार दाखल करण्याचा निर्णय घेतला. तक्रार नोंदवल्यानंतर, झोन 11 चे डीसीपी संदीप जाधव, वरिष्ठ निरीक्षक मधुसूदन नाईक आणि सायबर युनिटच्या पथकाने मोबाईल लोकेशनच्या आधारे आरोपीला ट्रेस केलं. या प्रकरणाबाबत पोलीस अधिकाऱ्यांनी माहिती देताना सांगितलं की, कर्जाची वसूली किंवा आर्थिक बाबी या कायदेशीर प्रक्रियेद्वारे सोडवता येऊ शकतात. यासाठी कोणाला मानसिक त्रास देणे किंवा त्यांची बदनामी करणे, हा गंभीर गुन्हा आहे. नागरिकांनी या प्रकरणांमध्ये तातडीने पोलिसांनी मदत घ्यावी. पोलिसांनी आरोपीची चौकशी केली असता त्याने आपला गुन्हा कबूल केला आणि आर्थिक दबावातून त्याने हे पाऊल उचलल्याचं सांगितलं जात आहे. 

हे ही वाचा: भंडारा हादरला! लग्न जमवून देत नसल्याने 33 वर्षीय मुलाने बापाच्या डोक्यात वीट घातली, जागेवर संपवलं

कांदिवलीत घडली अशीच एक घटना 

या वर्षी फेब्रुवारी महिन्यात सुद्धा अशीच एक घटना घडल्याची बातमी समोर आली होती. कर्ज वसूल करणाऱ्या एजंटकडून प्रचंड मानसिक त्रास सहन करावा लागल्याने कांदिवली येथील एका ट्रान्सपोर्ट व्यावसायिकाने आत्महत्या केल्याचं वृत्त होतं. पोलिसांनी दिलेल्या माहितीनुसार, उत्तर प्रदेशातील प्रतापगड येथील सूरज जयस्वाल यांनी एका वित्त कंपनीकडून कमर्शिअल वाहनासाठी कर्ज घेतले होते. कुटुंबात आर्थिक अडचण असल्यामुळे पीडित व्यावसायिक घेतलेलं कर्ज फेडू शकला नाही. त्यानंतर, कंपनीच्या रिकव्हरी एजंटने त्याला त्रास देण्यास सुरूवात केली. याच त्रासाला कंटाळून अखेर पीडित तरुणाने कांदिवली येथील गोकुळ नगरमधील त्याच्या घरात आत्महत्या केली.