मुंबई: पालकांनो सावधान! प्रतिष्ठित शाळेत अ‍ॅडमिशन देण्याच्या नावाखाली मोठी फसवणूक... ट्रॅफिक हवालदार निलंबित!

ट्रॅफिक कॉन्स्टेबलविरुद्ध FIR दाखल   

पोलिसांनी या प्रकरणातील मुख्य आरोपी महफूज जकी अहमद शेख उर्फ राजेश कोटवानी याला मागील आठवड्यातच अटक केल्याची माहिती आहे. तपासादरम्यान, या जाळ्यात शेख एकटा आरोपी नसून त्यामध्ये सरकारी डेटा पुरवण्यात एका वाहतूक हवालदार म्हणजेच ट्रॅफिक कॉन्स्टेबलचाही सहभाग असल्याची माहिती मिळाली. याप्रकरणी अमोल दत्तात्रय अवघडे या ट्रॅफिक कॉन्स्टेबलविरुद्ध FIR दाखल करण्यात आली आणि त्याचा गुन्हा समोर आल्यानंतर विभागाकडून त्याला निलंबित करण्यात आल्याची माहिती आहे. या दोन्ही आरोपींवर फसवणूक आणि विश्वासघात केल्याप्रकरणी गुन्हा दाखल करण्यात आला आहे. 

हे ही वाचा: पुण्यात मौजमजा करायला पैसे पुरेनात, बी.टेकच्या विद्यार्थ्याने मित्रांना सोबत घेऊन स्वत:च्या घरातच टाकला दरोडा

गाड्यांच्या नंबर प्लेट्सच्या माध्यमातून माहिती... 

तपास अधिकाऱ्यांनी दिलेल्या माहितीनुसार, मुख्य आरोपी राजेश कोटवानी अतिशय चलाखीने पालकांना आपल्या जाळ्यात ओढायचा. तो शाळा आणि कॉलेजच्या बाहेर पार्क केलेल्या गाड्यांच्या नंबर प्लेट्सचे फोटो काढायचा. त्याच्या आधारे, तो मुलांच्या संभाव्य पालकांना टार्गेट करायचा. त्यानंतर, तो हे फोटो थेट कॉन्स्टेबल अवघडे यांना पाठवायचा. या नंबर प्लेट्सच्या आधारे, आपल्या मुलांसाठी कोणते पालक अॅडमिशनच्या शोधत आहेत? याचा शोध घेतला जायचा आणि नंतर त्यांना फोन करून प्रतिष्ठित शाळा आणि कॉलेजात अॅडमिशन मिळवून देण्याचं आमिष दाखवायचे. 

प्रतिष्ठित शाळेत अॅडमिशन मिळवून देण्याचं आमिष 

कॉन्स्टेबल अवघडे आरोपी शेखला संबंधित वाहनाच्या मालकांची संपूर्ण माहिती उपलब्ध करुन द्यायचा. तो वाहतूक नियमांचे उल्लंघन केल्याबद्दल दंड भरण्यासाठी वापरल्या जाणाऱ्या ई-चलान मशीनद्वारे सरकारी डेटाबेस मिळवायचा. सरकारी यंत्रणेचा हा गैरवापर या प्रकरणातील अतिशय गंभीर गुन्हा मानला जात आहे. माहिती मिळाल्यानंतर, आरोपी मुलांच्या पालकांशी संपर्क साधायचा आणि काही स्पेशल कनेक्शनच्या माध्यमातून अॅडमिशन मिळवून देणार असल्याचं खोटं सांगायचा. अशा पद्धतीने, आरोपीने बऱ्याच लोकांना आपल्या जाळ्यात ओढलं. 

हे ही वाचा: हायकोर्ट संतापलं... ऐनवेळी निवडणूक पुढे ढकलणाऱ्या निवडणूक आयोगाची केली कठोर निंदा!

या प्रकरणासंदर्भात बऱ्याच तक्रारी आल्यामुळे, बीकेसी पोलिसांनी याचा तपास करण्यासाठी एक विशेष तपास पथक नेमलं. गेल्या आठवड्यात मुख्य आरोपी शेखला अटक करून त्याची चौकशी करण्यात आली आणि त्यामध्ये त्याने कॉन्स्टेबल अवघडे त्याच्या माहितीचा स्रोत असल्याचं कबूल केलं. त्यानंतर, पोलीस विभागाने 28 नोव्हेंबर रोजी अवघडेला सस्पेंड करण्यात आलं आणि त्याच्याविरुद्ध तपास सुरू केला. पोलीस आता या प्रकरणाचा अधिक तपास करत असल्याची माहिती आहे.