बडतर्फ IAS पूजा खेडकरला बांधून ठेवलं, आई-वडिलांना गुंगीचं औषध दिलं, घरातील नेपाळी नोकर मोबाईल घेऊन पळाला

Dismissed IAS officer Pooja Khedkar News : आयएएस पदावरून बडतर्फ करण्यात आलेल्या डॉ. पूजा खेडकर यांनी त्यांच्या पुण्यातील राहत्या घरात चोरी झाल्याचा गंभीर आरोप केला आहे. या संदर्भात त्यांनी चतुःश्रृंगी पोलीस ठाण्यात माहिती दिली असून, बाणेर रस्त्यावरील खेडकर कुटुंबाच्या बंगल्यात ही घटना घडल्याचे सांगितले जात आहे. ही घटना शनिवारी (दि.10 जानेवारी 2026) रात्री घडल्याचा दावा करण्यात आला आहे.

पोलिसांकडे देण्यात आलेल्या प्राथमिक माहितीनुसार, खेडकर कुटुंबाकडे काम करणाऱ्या एका नोकरानेच हा प्रकार केल्याचा संशय व्यक्त करण्यात आला आहे. संबंधित नोकराने दिलीप खेडकर आणि मनोरमा खेडकर यांना गुंगीचे औषध देऊन बेशुद्ध केल्याचा आरोप करण्यात आला आहे. त्यानंतर त्याने डॉ. पूजा खेडकर यांना दोरीने बांधून ठेवत घरातील मोबाईल फोन घेऊन पळ काढल्याचे सांगण्यात येत आहे.

या प्रकरणातील संशयित नोकर अवघ्या आठ दिवसांपूर्वी नेपाळमधून पुण्यात आला होता, अशी माहितीही पोलिसांकडून समोर आली आहे. तो काही दिवसांपासून खेडकर कुटुंबाच्या बंगल्यात काम करत होता. घटनेच्या वेळी घरात इतर कोणी उपस्थित नव्हते, अशी माहिती प्राथमिक तपासात समोर आली आहे. घटनेनंतर डॉ. पूजा खेडकर या बांधलेल्या अवस्थेत असल्याचे सांगितले जात आहे. मात्र, त्यांनी दाराच्या कडीचा वापर करून स्वतःला सोडवून घेतले. त्यानंतर घरात उपलब्ध असलेल्या दुसऱ्या मोबाईल फोनवरून त्यांनी चतुःश्रृंगी पोलिसांशी संपर्क साधून घटनेची माहिती दिली.

हेही वाचा : उद्धव ठाकरे, एकनाथ शिंदे की राज ठाकरे? बाळासाहेबांचा खरा वारसदार कोण? C Voter च्या सर्व्हेत कोणाला पसंती?

माहिती मिळताच चतुःश्रृंगी पोलीस तातडीने घटनास्थळी दाखल झाले. पोलिसांनी घराची पाहणी केली असता दिलीप खेडकर आणि मनोरमा खेडकर हे दोघेही बेशुद्ध अवस्थेत आढळून आले. पोलिसांनी तत्काळ त्यांना उपचारासाठी एका खासगी रुग्णालयात दाखल केले. उपचारानंतर त्यांची प्रकृती स्थिर असल्याची माहिती पोलिसांनी दिली आहे. दरम्यान, या घटनेप्रकरणी अद्याप कोणतीही लेखी तक्रार दाखल करण्यात आलेली नाही. मनःस्थिती स्थिर झाल्यानंतर तक्रार दिली जाईल, असे डॉ. पूजा खेडकर यांनी पोलिसांना कळवले आहे. सध्या या प्रकरणी केवळ प्राथमिक माहितीच्या आधारे पोलिसांकडून तपास सुरू आहे.

घरातून मोबाईल फोन व्यतिरिक्त इतर कोणतीही मौल्यवान वस्तू किंवा रोख रक्कम चोरीला गेली आहे की नाही, याबाबत सध्या कोणतीही अधिकृत माहिती समोर आलेली नाही. पोलिसांकडून याची पडताळणी केली जात असून पुढील तपास सुरू आहे. या संपूर्ण घटनेचा अधिक तपास चतुःश्रृंगी पोलीस करत असून, संशयित नोकराचा शोध घेण्यासाठी विविध पथके काम करत आहेत. संबंधित नोकराचा शोध लागल्यानंतरच या प्रकरणातील नेमकी माहिती समोर येणार असल्याचे पोलिसांकडून सांगण्यात आले आहे.

इतर महत्त्वाच्या बातम्या 

काळीज पिळवटणारा व्हिडीओ, पत्नीच्या डिलिव्हरीसाठी आलेल्या जवानाचा मृत्यू, आईसह 8 तासांच्या लेकीने घेतले अंत्यदर्शन; महाराष्ट्र हळहळला