माधुरीनंतर महाराष्ट्रातील आणखी एक हत्ती वनतारामध्ये जाणार, कोल्हापूर सर्किट बेंचचा मोठा निर्णय

गेल्या काही महिन्यांपासून सिंधुदुर्गातील ओंकार हत्तीला वनतारा केंद्रात हलविण्याची प्रक्रिया सुरू होती. याला विरोध दर्शवत रोहित कांबळे यांनी मुंबई उच्च न्यायालयाच्या कोल्हापूर सर्किट बेंचमध्ये महाराष्ट्र सरकार आणि वनविभागाविरोधात जनहित याचिका दाखल केली होती. न्यायमूर्ती कर्णिक आणि कडेठाणकर यांच्या खंडपीठासमोर या प्रकरणाची सुनावणी सुरू आहे. सिंधुदुर्गमधील दोडामार्ग हा हत्तींचा नैसर्गिक अधिवास असल्याने, अधिवास बदलल्यास ओंकारच्या जीवनासाठी धोका निर्माण होऊ शकतो, अशी युक्ती याचिकाकर्त्यांच्या वकिलांनी मांडली.

हेही वाचा : तुळजापूरः Drugs प्रकरणातील आरोपीचा चक्क भाजपमध्ये प्रवेश, राणा पाटलांच्या खेळीने फडणवीसांची अडचण; सुप्रिया सुळेंनी तर थेट...

नागपूरच्या मुख्य वनसंरक्षकांच्या अहवालानुसार, एखादा हत्ती एका ठिकाणाहून दुसऱ्या ठिकाणी हलवता येऊ शकतो. दोडामार्ग परिसरात मानवी वस्तीत वारंवार प्रवेश करणाऱ्या ‘ओंकार’ या हत्तीला पकडून गुजरातमधील ‘वनतारा’ प्राणी संगोपन केंद्रात पाठविण्याची प्रक्रिया सुरू होती. मात्र, या निर्णयाला प्रा. रोहित कांबळे यांनी विरोध दर्शवून जनहित याचिका दाखल केली होती.

प्रा. कांबळे, वकील. उदय वाडकर आणि वकील. केदार लाड यांनी युक्तिवाद करताना सांगितले की, वन्यजीव संरक्षण कायद्यातील कलम 12 नुसार हत्तीचा अधिवास बदलण्यासाठी केंद्र सरकारची पूर्वपरवानगी आवश्यक आहे. त्यांनी मागणी केली की ‘ओंकार’ हत्तीला कोल्हापूर वन विभागाच्या मर्यादेतच असलेल्या नैसर्गिक अधिवासात ठेवावे. तसेच, याच विभागातील आठ हत्तींचा यापूर्वी मृत्यू झाल्याने त्याबाबत चौकशी करावी, ‘ओंकार’ला पकडण्याची मोहीम तातडीने थांबवावी आणि त्याला चांदोली, राधानगरी, कोयना अभयारण्य अथवा सह्याद्री व्याघ्र प्रकल्पात हलवावे, अशी मागणीही त्यांनी केली.

यावर वन विभागाने ‘वनतारा’ व्यतिरिक्त अन्यत्र व्यवस्था नसल्याचे स्पष्ट केले आणि त्यामुळे ‘ओंकार’ला तेथेच हलवावे, अशी भूमिका मांडली. सरकारी वकील कापरे यांनीही सर्वोच्च न्यायालयातील काही निर्णयांचा आधार घेत तात्पुरत्या स्वरूपात ‘ओंकार’ हत्तीला गुजरातमधील ‘वनतारा’ केंद्रात पाठवण्याची शिफारस केली. या सर्व युक्तिवादानंतर न्यायमूर्तींनी ‘ओंकार’ला तात्पुरते वनतारा केंद्रात हलविण्याचे आदेश दिले.

इतर महत्त्वाच्या बातम्या 

तुळजापूरः Drugs प्रकरणातील आरोपीचा चक्क भाजपमध्ये प्रवेश, राणा पाटलांच्या खेळीने फडणवीसांची अडचण; सुप्रिया सुळेंनी तर थेट...