आर्यन खानची वेब सीरिज वादाच्या विळख्यात! समीर वानखेडेंनी दाखल केला खटला... 'द बॅड्स ऑफ बॉलीवूड' चर्चेत

खोट्या, दुर्भावनापूर्ण आणि अपमानास्पद बाबी

समीर वानखेडे यांनी त्यांच्या याचिकेत वेब सिरीजविरुद्ध कायमस्वरूपी बंदीचे (Permanent & Mandatory Injunction) आदेश आणि नुकसानभरपाई (Damages)ची मागणी केली आहे. अभिनेता शाहरुख खान आणि गौरी खान यांच्या मालकीची रेड चिलीज एंटरटेनमेंट प्रायव्हेट लिमिटेड, ओटीटी प्लॅटफॉर्म नेटफ्लिक्स आणि इतर पक्षांविरुद्ध हा गुन्हा दाखल करण्यात आला आहे. 'बॅड्स ऑफ बॉलीवूड' या वेब सिरीजमधून खोट्या, दुर्भावनापूर्ण आणि अपमानास्पद बाबी सादर करण्यात आल्या आल्याचा आरोप समीर वानखेडे यांनी याचिकेत केला आहे. तसेच, या सीरिजच्या माध्यमातून मादक पदार्थांच्या विरोधात अंमलबजावणी संस्थांना नकारात्मक आणि अपमानास्पद पद्धतीने चित्रित केलं असून अशा प्रकारच्या संस्थांवरील जनतेचा विश्वास कमजोर होत असल्याचं देखील त्यांनी स्पष्ट केलं आहे.

हे ही वाचा:  Govt Job: फ्रेशर्स उमेदवारांची चिंताच मिटली! भारत सरकारच्या कंपनीत मिळवा नोकरी, कधीपर्यंत कराल अर्ज?

समीर वानखेडे यांच्या मते, या वेब सीरिजमध्ये जाणूनबुजून त्यांच्याविरुद्ध पक्षपाती आणि अपमानास्पद कंटेट दाखवण्यात आला आहे. समीर वानखेडे आणि आर्यन खान यांच्याशी संबंधित हा खटला सध्या मुंबई उच्च न्यायालय आणि मुंबईतील विशेष एनडीपीएस न्यायालयात प्रलंबित आहे.

राष्ट्रीय चिन्हाचा भाग असलेल्या घोषणेचा अपमान

वानखेडे यांचा आणखी एक असा आरोप आहे की वेब सीरिजमध्ये एक पात्र "सत्यमेव जयते" म्हणताना दाखवलं आहे, पण त्यानंतर लगेच ती व्यक्ती अश्लील हावभाव करताना दिसून येत आहे. असं कृत्य राष्ट्रीय चिन्हाचा भाग असलेल्या घोषणेचा अपमान असून तो राष्ट्रीय सन्मानाचा अपमान प्रतिबंधक कायदा, 1971 अंतर्गत दंडनीय गुन्हा असल्याचं त्यांनी सांगितलं आहे. 

हे ही वाचा: मुंबईची खबर: CSMT ते ठाणे दरम्यान मेट्रो सुरू होणार... मुख्यमंत्र्यांनी केली घोषणा! तारीख सुद्धा ठरली?

2 कोटी रुपयांची नुकसान भरपाई 

याशिवाय, सीरिजमध्ये अश्लील आणि आक्षेपार्ह साहित्यांचा वापर करून राष्ट्रीय भावना दुखावण्याचा प्रयत्न केल्याने यामध्ये दर्शवण्यात आलेल्या बाबी आणि घटना माहिती तंत्रज्ञान कायदा (Information Technology Act) आणि भारतीय दंड संहिता म्हणजेच आताच्या 'भारतीय दंड संहिता - बीएनएस'च्या विविध कलमांचं उल्लंघन करत असल्याचं सांगितलं गेलं आहे. या वेब सीरिजविरुद्ध मानहानीच्या याचिकेत समीर वानखेडे यांनी 2 कोटी रुपयांची नुकसान भरपाई मागितली असून ती कर्करोगाच्या रुग्णांच्या उपचारांसाठी टाटा मेमोरियल कॅन्सर हॉस्पिटलला दान करण्याचा प्रस्ताव असल्याची माहिती आहे.