बीड : तुला तीन मुली झाल्या, वंशाला दिवा नाही, 25 वर्षीय विवाहितेने छळाला कंटाळून आयुष्य संपवलं

याबाबत मिळालेल्या माहितीनुसार, लातूर जिल्ह्यातील आजरखेडा, तालुका रेणापूर येथील प्रकाश सूर्यवंशी यांची मुलगी अरुणा हिचा विवाह 16 ऑगस्ट 2019 रोजी केज तालुक्यातील उंदरी येथील उद्धव ठोंबरे यांच्याशी झाला होता. लग्नानंतर सुरुवातीच्या काळात उद्धव ठोंबरे बँकेत नोकरी करत होते. मात्र नंतर त्यांनी नोकरी सोडून शेती व्यवसाय सुरू केला. दरम्यान, अरुणा आणि उद्धव यांना एकूण तीन मुली झाल्या. मोठी मुलगी कु. राजनंदिनी (वय 5 वर्षे) तसेच कु. आर्या आणि कु. अपूर्वा (वय 4 वर्षे) या जुळ्या मुली आहेत. तीन मुली झाल्याच्या कारणावरून अरुणा हिला सासरी सातत्याने त्रास दिला जात होता. पहिल्या मुलीनंतर पुन्हा दोन जुळ्या मुली झाल्याने नवरा उद्धव ठोंबरे हा दारू पिऊन अरुणा हिच्याशी शिवीगाळ व मारहाण करत असल्याचा आरोप आहे.

हेही वाचा : 'फडणवीस म्हणतात अण्णामलाई 'तसं' म्हणालेच नाही ..', राज ठाकरेंकडून लाव रे तो व्हिडिओ.. फडणवीसांवर पडले तुटून!

इतकेच नव्हे तर सासू इंदुबाई उत्तम ठोंबरे आणि सासरे उत्तम रघुनाथ ठोंबरे हे देखील “आम्हाला मुलगा हवा होता, तुला तर 3-3 मुली झाल्या, तू आमचा वंश बुडविला,” असे म्हणत तिला घालून-पाडून बोलत, शिवीगाळ करून मानसिक त्रास देत असल्याचे तक्रारीत नमूद करण्यात आले आहे. या सततच्या अपमानामुळे अरुणा मानसिकदृष्ट्या खचली होती. सासरकडून होत असलेल्या छळाबाबत अरुणा हिने आपल्या आई-वडिलांना, भावाला तसेच मोठी बहीण करुणा हिला वेळोवेळी फोनवरून व माहेरी आल्यानंतर सांगितले होते. “मला आता सासरी नांदायला जायचे नाही,” असे ती वारंवार म्हणत असल्याचेही नातेवाइकांनी सांगितले. मात्र, माहेरच्या मंडळींनी तिची समजूत काढत तिला धीर देण्याचा प्रयत्न केला होता. अखेर या सर्व त्रासाला कंटाळून अरुणा ठोंबरे हिने दि. 10 जानेवारी रोजी दुपारी सुमारे 2:00 वाजण्याच्या सुमारास उंदरी येथील राहत्या घरी घरातील फॅनला साडीने गळफास घेऊन आत्महत्या केली.

या प्रकरणी अरुणा ठोंबरे हिचा भाऊ गोविंद सूर्यवंशी यांच्या तक्रारीवरून युसुफवडगाव पोलिस ठाण्यात उद्धव ठोंबरे, त्याची आई इंदुबाई ठोंबरे आणि वडील उत्तम ठोंबरे यांच्याविरुद्ध गु. र. नं. 09/2026 अन्वये भा. न्या. सं. कलम 85, 108, 115(2), 352, 3(5) नुसार गुन्हा दाखल करण्यात आला आहे. या प्रकरणाचा तपास सहाय्यक पोलिस निरीक्षक मच्छिंद्रनाथ शेंडगे यांच्या मार्गदर्शनाखाली पोलिस उपनिरीक्षक भारत बरडे हे करीत आहेत. अरुणा ठोंबरे हिच्या मृत्यूनंतर कु. राजनंदिनी (वय 5 वर्षे), कु. आर्या आणि कु. अपूर्वा (वय 4 वर्षे) या तिन्ही चिमुकल्या आईच्या मायेला मुकल्या असून त्यांच्या भवितव्याबाबत हळहळ व्यक्त केली जात आहे.

इतर महत्त्वाच्या बातम्या 

सरपंचाच्या मुलाचे दुसऱ्या जातीतील मुलीशी प्रेमसंबंध, आईने विरोध करताच इंग्लंडमध्ये रचला खुनाचा कट; घरी पोहोचताच काटा काढला