Hingoli Accident: देवदर्शनाला पायी निघाले अन् 4 जणांना काळाने रत्यातच गाठलं!

पिकअप चालक झोपेत गाडी चालवत होता त्यामुळे हा अपघात झाल्याचे सांगण्यात येत आहे. सध्या पोलीस घटनास्थळी दाखल झाले आहेत. जखमींना रुग्णालयात दाखल करण्यात आले आहे. पुढील कारवाई हिंगोली पोलीस करत आहेत.

मिळालेल्या माहितीनुसार, देवदर्शनासाठी पायी निघालेल्या भाविकांना भरधाव वेगाने जाणाऱ्या पिकप वाहनाने चिरडल्याची ही घटना आहे. या अपघातात चौघांचा जागीच मृत्यू झाला आहे तर दोन जण गंभीर जखमी झाले आहे. हे सर्व भाविक हिंगोली तालुक्यातील सिरसम गावचे रहिवासी आहेत.

आज शनिवार (24 फेब्रुवारी) असल्याने भाविकांनी हनुमानाच्या दर्शनाला जाण्याचे नियोजन आखले होते. भाविक त्यांच्या गावातून (सिरसम) माळहिवरा पाटी येथील मारुतीच्या दर्शनाला निघाले होते. यावेळी मागून येणाऱ्या बोलेरो पिकअपने त्यांना चिरडलं. 

यामध्ये चार जणांचा मृत्यू झाला आहे. घटनेची माहिती मिळताच पोलीस तातडीने घटनास्थळी दाखल झाले. जखमी असलेल्या दोन जणांना हिंगोली शासकीय रूग्णालयात दाखल करण्यात आलं आहे.