पाकिस्तानमध्ये HIV संक्रमण महामारीप्रमाणे पसरलं, रुग्णांमध्ये 200 टक्क्यांनी वाढ, WHO महत्त्वाचा इशारा

गेल्या 15 वर्षांत पाकिस्तानमध्ये एचआयव्हीच्या रुग्णसंख्येत झपाट्याने वाढ झाली आहे. 2010 मध्ये देशात 16 हजार नवे एचआयव्ही रुग्ण आढळले होते. 2024 पर्यंत ही संख्या 48 हजारांवर पोहोचली असून तब्बल 200 टक्क्यांनी वाढ झाल्याचे WHO ने स्पष्ट केले आहे. ही वाढ केवळ आकड्यांची नसून संक्रमण समाजाच्या सर्व स्तरांमध्ये पसरत असल्याचे त्यावरून दिसते.

WHO चा गंभीर इशारा

पूर्वी एचआयव्ही प्रामुख्याने ड्रग्ज घेणारे, संक्रमित रक्त चढविणारे किंवा उच्च-जोखमीच्या गटांपुरते सीमित होते. मात्र आता हे संक्रमण मुलांपासून ते महिलांपर्यंत आणि सामान्य लोकांपर्यंत झपाट्याने पसरण्यास सुरुवात झाली आहे. WHOचे प्रतिनिधी डॉ. लुओ दापेंग यांनी सांगितले की, मुलांवर होणारा परिणाम पाकिस्तानच्या भविष्यासाठी अत्यंत धोकादायक ठरू शकतो. “ही महामारी रोखण्यासाठी सरकार, आरोग्य संस्था आणि संपूर्ण समाजाने एकत्रितपणे प्रयत्न करणे गरजेचे आहे,” असे त्यांनी स्पष्ट केले.

संक्रमण वाढण्याची मुख्य कारणे

आरोग्य व्यवस्थेतील त्रुटी, असुरक्षित इंजेक्शन्सचा वापर, दूषित रक्त चढविण्याचे प्रकार, रुग्णालयांमधील संक्रमण नियंत्रणाची कमतरता, गरोदर महिलांची एचआयव्ही चाचणी न होणे आणि सुरक्षित लैंगिक व्यवहारांची माहिती नसणे हे संक्रमण वाढण्यामागील प्रमुख घटक असल्याचे WHOच्या अहवालात नमूद केले आहे.

विशेषतः मुलांमध्ये एचआयव्ही संक्रमणाचा वेग वाढल्याचे चिंताजनक चित्र समोर आले आहे. 2010 मध्ये 0 ते 14 वयोगटातील मुलांमध्ये 530 नव्या घटनांची नोंद झाली होती. 2023 मध्ये ही संख्या 1,800 वर पोहोचली. लरकाना, जैकोबाबाद आणि मीरपूर खास अशा क्षेत्रांमध्ये अलीकडे झालेल्या प्रादुर्भावात 80 टक्क्यांहून अधिक रुग्ण हे मुले असल्याचे समोर आले आहे.

भविष्यासाठी मोठा इशारा

WHOने स्पष्ट केले आहे की, वेळेवर चाचण्या, सुरक्षित आरोग्य पद्धती, तपासणी व उपचारांच्या उपलब्धतेत वाढ आणि जनजागृती मोहिमा यांच्या आधारे एचआयव्हीचा फैलाव नियंत्रणात ठेवता येऊ शकतो. अन्यथा ही समस्या आरोग्य संकटापलीकडे जाऊन पाकिस्तानसाठी गंभीर सामाजिक आणि आर्थिक आव्हान ठरू शकते.

इतर महत्त्वाच्या बातम्या 

बिझनेस पार्टनर बनला जिगरी दोस्त, पण त्यानेच बायकोसोबत अनैतिक संबंध ठेऊन केला घात, संतापलेल्या रामेश्वरने ट्रॅक्टरने चिरडलं