नाशिक : महिलेने डोळ्यात चटणी टाकून चिरलं, तरुणावर कोयत्याने सपासप वार; कार चालकाने व्हिडीओ केला शूट

हल्ल्याचा थरार आणि आरोपींचे पलायन

महामार्गावर घडलेला हा थरार अत्यंत अंगावर शहारे आणणारा होता. व्हिडिओमध्ये दिसत असल्याप्रमाणे, काळ्या रंगाचा शर्ट घातलेला एक तरुण शांतपणे उभा राहून महिला करत असलेला हा वार पाहत होता. जखमी सूरज कुमार जेव्हा जमिनीवर पडला, तेव्हा ही महिला त्याच्यावर वार करत होती आणि तो उघड्या डोळ्यांनी हे सर्व पाहत होता. कृत्य केल्यानंतर ही महिला त्या तरुणासोबत मोटारसायकलवर बसून मुंबईच्या दिशेने पसार झाली. आरोपींनी आपली ओळख लपवण्यासाठी मोटारसायकलची नंबर प्लेट एका कापडाने झाकून ठेवली होती. पोलिसांना मिळालेल्या माहितीनुसार, सूरज कुमारला मधुमेह (Diabetes) असून त्याच्या पायाला आधीच मोठी दुखापत झाली होती, ज्यामुळे पुढील 2 दिवसांत त्याच्या पायाची मोठी शस्त्रक्रिया होणार होती, मात्र त्याआधीच त्याच्यावर हा प्राणघातक हल्ला करण्यात आला.

हल्ल्यापूर्वीचा घटनाक्रम आणि पोलिसांचा संशय

सूरज कुमार हा मूळचा अहमदाबादचा रहिवासी असून तो सध्या जुन्या नाशिकमधील नानावली येथे आपल्या वहिनीकडे राहण्यासाठी आला होता. तो वाडीवरे गावातील पेलिकन कंपनीत कामाला होता. सोमवारी दुपारी साधारण 3:30 च्या सुमारास सूरजचा फोनवर कोणासोबत तरी जोरदार वाद झाला होता. "तू मला सकाळपासून त्रास देतोयस" असे रागात बोलून तो घराबाहेर पडला. यावेळी त्याची वहिनी मेघा गोपाल सोलंकी यांनी त्याला थांबवण्याचा प्रयत्न केला, मात्र तो संतापलेल्या अवस्थेत कोणाचेही न ऐकता निघून गेला. या घटनेच्या साधारण एका तासानंतर त्याचा मोबाईल बंद झाला आणि त्यानंतर महामार्गावर ही हल्ल्याची घटना घडली. सूरजच्या वैयक्तिक वादातून किंवा कामाच्या ठिकाणच्या भांडणातून हा हल्ला झाला असावा, असा प्राथमिक अंदाज व्यक्त केला जात आहे.

या घटनेची माहिती मिळताच पोलिसांनी तपासाची चक्रे वेगाने फिरवली असून,  हल्लेखोर महिलेने ज्या प्रकारे नियोजनबद्धरीतीने मिरची पूड आणि शस्त्राचा वापर केला, त्यावरून हे पूर्ववैमनस्य असावे असे वाटते. आरोपींना पकडण्यासाठी पोलिसांनी महामार्गावरील सीसीटीव्ही फुटेज आणि व्हायरल झालेला व्हिडिओ तपासासाठी ताब्यात घेतला आहे. दरम्यान, जिल्हा रुग्णालयात उपचार घेत असलेल्या सूरज कुमारची प्रकृती अजूनही चिंताजनक असून, डॉक्टरांकडून त्याचे प्राण वाचवण्यासाठी शर्थीचे प्रयत्न केले जात आहेत. पोलीस आता त्या संशयित कंपनीतील व्यक्तींची चौकशी करत असून लवकरच या हल्ल्यामागचे नेमके कारण स्पष्ट होईल.

इतर महत्त्वाच्या बातम्या 

धाराशिव : भाडेकरूला घरमालकाने भाडे मागितले; पण मिळाले सत्तूरचे वार..., धडकी भरवणारा VIDEO