वडील फुटपाथवर बॅग विकतात, मुलाचं NEET परीक्षेत यश; ओमची ह्रदयस्पर्शी कहाणी

हेही वाचा : राम मंदिरातील चोरीबाबत राहुल गांधींचं पीएम मोदींना पत्र, नेमंक काय म्हणाले?

दहावीच्या बोर्ड परीक्षेत मध्य प्रदेशात मिळवलेला सातवा क्रमांक 

ओम आर्थिकदृष्ट्या सक्षम कुटुंबातून आलेला नाही. घरातील परिस्थिती अशी होती की रोजच्या कमाईवरच पुढच्या दिवसाचा खर्च भागत असे. वडिलांच्या फुटपाथवरील बॅग विक्रीतूनच घराचा खर्च आणि मुलांचे शिक्षण चालत होते. मात्र या परिस्थितीने ओमच्या स्वप्नांवर कधीही मर्यादा आणल्या नाहीत. लहानपणापासूनच तो अभ्यासात हुशार होता. दहावीच्या बोर्ड परीक्षेत त्याने संपूर्ण मध्य प्रदेशात सातवा क्रमांक मिळवला. त्यानंतर बारावीच्या परीक्षेतही तो राज्यातील अव्वल दहा विद्यार्थ्यांमध्ये स्थान मिळवण्यात यशस्वी ठरला. त्याच्या मेहनतीचे आणि अभ्यासातील सातत्याचे कौतुक शिक्षकही करत असत. दरम्यान, काही वर्षांपूर्वी हृदयविकाराच्या झटक्याने त्याच्या आजीचे निधन झाले. या घटनेने ओमच्या आयुष्याला वेगळी दिशा दिली. त्याने मनाशी ठरवले की आपण डॉक्टर व्हायचे आणि रुग्णांना उत्तम उपचार मिळावेत यासाठी काम करायचे. याच निर्धाराने त्याच्या संघर्षाला नवे बळ दिले.

हेही वाचा : "त्यांना ब्लड प्रेशरचा त्रास, कृपया ...", अभिजीत दिपकेंचं आई-वडिलांबाबत सर्वांना महत्त्वाचं आवाहन

NEET परीक्षेत मिळवले 720 पैकी 521 गुण

NEET परीक्षेची तयारी करताना ओमसमोर मोठे आव्हान होते. लाखो विद्यार्थ्यांमधील स्पर्धा आणि परीक्षेशी संबंधित पेपर लीकच्या घटनेमुळे निर्माण झालेली परिस्थिती यामुळे अनेक अडचणी निर्माण झाल्या. तरीही त्याने अभ्यासात खंड पडू दिला नाही. आत्मविश्वास कायम ठेवत त्याने पुन्हा परीक्षा दिली. री-NEET च्या जाहीर झालेल्या निकालात ओमने 720 पैकी 521 गुण मिळवत पहिल्याच प्रयत्नात परीक्षा उत्तीर्ण केली. यापूर्वी झालेल्या परीक्षेत त्याला 625 गुण मिळाले होते. मात्र बदललेल्या परिस्थितीने त्याचा आत्मविश्वास ढळू दिला नाही. त्याचे यश केवळ त्याचे वैयक्तिक यश नसून संपूर्ण चौकसे कुटुंबासाठी अभिमानाचा क्षण ठरला आहे. अनेक वर्षांच्या कष्टांना आणि त्यागाला या यशाने मोठे फळ मिळाले आहे.

ओमच्या यशाबद्दल बोलताना त्याचे वडील रमेश चौकसे सांगतात की त्यांनी नेहमी मुलाला शिक्षणासाठी प्रोत्साहन दिले. आर्थिक अडचणी होत्या, पण स्वप्ने पूर्ण करण्यासाठी पैसा नव्हे तर मेहनत महत्त्वाची असते, हा विश्वास त्यांनी कायम ठेवला. त्यांना खात्री होती की मुलगा प्रामाणिकपणे प्रयत्न करत राहिला तर त्याला यश नक्की मिळेल. ओमची आई वेदांती चौकसेही या यशाचे श्रेय त्याच्या मेहनतीला आणि शिस्तबद्ध आयुष्याला देतात. त्यांच्या मते, ओमने कधीही परिस्थितीचे कारण पुढे केले नाही. अभ्यासाबरोबरच घराची आणि वडिलांच्या दुकानाची जबाबदारीही त्याने तितक्याच प्रामाणिकपणे पार पाडली. आजही शाळेबाहेर रमेश चौकसे यांचे बॅगचे दुकान भरते, मात्र आता ते केवळ बॅग विकण्याचे ठिकाण राहिलेले नाही. ते एका अशा संघर्षाची साक्ष देत आहे, ज्यातून मेहनत, शिस्त आणि जिद्दीच्या जोरावर फुटपाथवरूनही डॉक्टर होण्याचा प्रवास सुरू होऊ शकतो. ओम आता डॉक्टर बनण्याच्या आपल्या स्वप्नाच्या दिशेने पुढे जात असून, आयुष्यातील संघर्षच आपल्याला अधिक चांगला डॉक्टर बनवेल, असा त्याचा विश्वास आहे.