Video: महाबळेश्वर, साताऱ्यात तुफान पाऊस, वेण्णा लेक ओव्हरफ्लो.. ही दृश्य पाहून तुम्हालाही भरेल धडकी!

वेण्णा लेक ओव्हरफ्लो: पर्यटकांचा उत्साह, प्रशासनाची खबरदारी

महाबळेश्वरमधील वेण्णा लेक हे पर्यटकांचे प्रमुख आकर्षण आहे. गेल्या काही दिवसांपासून सातत्याने पडणाऱ्या मुसळधार पावसामुळे या तलावाची पाणी पातळी कमाल मर्यादेपर्यंत पोहोचली आहे. परिणामी, तलावातून पाण्याचा विसर्ग सुरू झाला आहे.

हे ही वाचा>> Rain Update: जगबुडीचा कहर, रत्नागिरी गेलं पाण्याखाली.. पुराचं पाणी पाहून तुम्हालाही भरेल धडकी

वेण्णा लेक परिसरात पाण्याचा प्रवाह आणि धुक्याची चादर यामुळे निसर्गरम्य वातावरण तयार झाले आहे. मात्र, या परिस्थितीमुळे प्रशासनाने खबरदारीचा उपाय म्हणून पर्यटकांना सावधगिरी बाळगण्याचे आवाहन केले आहे. मुसळधार पावसामुळे दरडी कोसळण्याचा धोका वाढला आहे. त्यामुळे सातारा जिल्हा प्रशासनाने 19 ऑगस्ट 2025 पर्यंत महाबळेश्वर, पाचगणी, कास पठार, ठोसेघर धबधबा आणि अजिंक्यतारा यांसारखी प्रमुख पर्यटनस्थळे बंद ठेवण्याचा निर्णय घेतला आहे.

साताऱ्यात तुफान पाऊस

सातारा जिल्ह्याच्या पश्चिम भागात, विशेषतः महाबळेश्वर, जावळी, वाई, पाटण आणि कराड या भागात पावसाचा जोर कायम आहे. गेल्या 24 तासांत महाबळेश्वरमध्ये तुफान पाऊस सुरू आहे. त्यामुळे अनेक ठिकाणी रस्त्यांवर पाणी साचले असून, काही ठिकाणी वाहतूक देखील विस्कळीत झाली आहे.

हे ही वाचा>> पुण्याची वाट लागली, पावसाचं थैमान.. खडकवासला धरणातून पाणीही सोडलं!

पावसामुळे शेतीवरही मोठा परिणाम झाला आहे. यापूर्वी मे 2025 मध्ये झालेल्या अवकाळी पावसाने महाबळेश्वर परिसरातील स्ट्रॉबेरी आणि बलबेरी पिकांचे मोठ्या प्रमाणात नुकसान झालेले. सध्या सुरू असलेल्या पावसामुळे शेतकऱ्यांपुढे पुन्हा एकदा संकट उभे ठाकले आहे.

हवामान विभागाचा इशारा

हवामान विभागाने सातारा जिल्ह्यासह कोकण, पश्चिम महाराष्ट्र आणि मराठवाड्यात पुढील काही दिवस मुसळधार पावसाचा इशारा दिला आहे. विशेषतः कोकण किनारपट्टीवर जोरदार पावसाची शक्यता असून, रायगड, रत्नागिरी आणि सिंधुदुर्ग जिल्ह्यांना ऑरेंज अलर्ट जारी करण्यात आला आहे. सातारा जिल्ह्यातील नदीकाठच्या गावांना सावधानतेचा इशारा देण्यात आला आहे.

प्रशासन आणि स्थानिकांचे उपाय

सातारा जिल्हा प्रशासनाने पावसाच्या पार्श्वभूमीवर आपत्कालीन व्यवस्थापन यंत्रणा सज्ज ठेवली आहे. रस्ते खचणे, दरडी कोसळणे आणि पूरस्थिती टाळण्यासाठी स्थानिक प्रशासन सतर्क आहे. स्थानिक रहिवाशांना नदीकाठच्या भागात न जाण्याचे आणि पर्यटकांना सुरक्षित ठिकाणी राहण्याचे आवाहन करण्यात आले आहे.

पर्यटकांसाठी सूचना

महाबळेश्वर आणि पाचगणी ही ठिकाणे पावसाळ्यात निसर्ग सौंदर्यासाठी प्रसिद्ध असली, तरी सध्याच्या परिस्थितीत पर्यटकांनी प्रवास टाळावा, अशा सूचना प्रशासनाने केल्या आहेत. कोणत्याही दुर्घटना होऊ नये यासाठी प्रशासनाकडून सातत्याने खबरदारी घेतली जात आहे.