पत्नीवर अ‍ॅसिड फेकलं अन् नंतर, छतावरून खाली ढकललं... पतीच्या जाचामुळे महिलेचा मृत्यू!

पतीच्या जाचाला वैतागली

संबंधित घटना हिमाचल प्रदेशातील मंडी येथे घडली. पीडित महिलेचं नाव ममता ठाकूर असल्याची माहिती आहे. पोलिसांच्या माहितीनुसार, आरोपी नंद लाल सतत ममताला मारहाण करायचा. दोघांमध्ये बऱ्याच काळापासून वाद सुरू होता. दरम्यान, ममता खूप आजारी पडली. आपल्या पतीच्या वागण्याला कंटाळून पीडितेने सोशल मीडियावर एक पोस्टसुद्धा केली होती. यामध्ये, तिने तिच्या पतीवर गंभीर आरोप केले होते. याच कारणामुळे, नंद लाल पत्नीवर प्रचंड संतापला होता. 

आधी अॅसिड अटॅक आणि नंतर, छतावरून खाली...

15 नोव्हेंबर रोजी नंद लाल आणि ममता यांच्यात मोठा वाद झाला. भांडण सुरू असताना नंद लालने रागाच्या भरात पत्नीवर अॅसिड फेकलं. इतकेच नव्हे तर, त्यानंतर आरोपी पतीने ममताला छतावरून खाली ढकललं. यामुळे पीडिता खाली कोसळली. घटनेनंतर, आरोपी घरातून फरार झाला. त्यावेळी, शेजाऱ्यांनी ममता रक्ताने माखलेल्या अवस्थेत पाहिलं आणि तिला मंडीच्या रुग्णालयात नेण्यात आलं. 

हे ही वाचा: नांदेड हादरलं! 7 वर्षांच्या शाळकरी मुलीवर शिक्षकाचा लैंगिक अत्याचार, आरोपी पोलिसांच्या ताब्यात...

उपचारादरम्यान पीडितेचा मृत्यू 

पीडितेची प्रकृती गंभीर असल्याचं पाहून डॉक्टरांनी तिला तातडीने PGI चंदीगड येथे रेफर केलं. तिथे डॉक्टरांनी चार दिवस तिचा जीव वाचवण्याचा प्रयत्न केला, पण अॅसिडमुळे जळजळ आणि गंभीर जखमांमुळे तिची प्रकृती खालावली आणि बुधवारी रात्री तिचा मृत्यू झाला.

हे ही वाचा: सावधान! शेअर मार्केटच्या ग्रुपमध्ये जॉइन केलं अन् ठाण्यातील वृद्धाला 6.44 कोटी रुपयांना गंडा... पोलिसांचं नागरिकांना आवाहन

पीडितेच्या नातेवाईकांनी केलेल्या तक्रारीच्या आधारे, पोलिसांनी आरोपी पतीविरुद्ध हत्येचा प्रयत्न केल्याबद्दल गुन्हा दाखल केला होता. मात्र, ममताच्या मृत्यूनंतर नंद लालविरुद्ध हत्येचा गुन्हा दाखल करण्यात आला आहे. पोलिसांनी आरोपीला अटक केली असून तो सध्या न्यायालयीन कोठडीत असल्याचं सांगितलं जात आहे. या प्रकरणासंबंधी कायदेशीर कारवाई केली जाणार असून घटनेचा तपास अद्याप सुरू असल्याची माहिती आहे.