हे ही वाचा : एकीकडे ममता बॅनर्जींचा लढा; तर दुसरीकडे सर्वसामान्य गमावताहेत जीव! SIR सुनावणीला जाताना शिक्षकाच्या कुटुंबाचा करुण अंत

काय घटना घडली होती?

बिहारच्या सहरसा जिल्ह्यात नशेच्या एका विचित्र नादाने तीन कुटुंबांतील कर्ते तरुण हिरावले गेले आहेत. फरेबा टोला येथे शनिवारी (7 फेब्रुवारी) चार मित्रांनी एकत्र येत कीटकनाशक प्यायले. या घटनेत दोघांचा जागीच मृत्यू झाला होता, तर तिसरा मित्र मुरारी कुमार याचा उपचारादरम्यान मृत्यू झाला. सध्या चौथा मित्र सनोज कुमार याच्यावर खगडिया जिल्ह्यात उपचार सुरु असून त्याची प्रकृती गंभीर आहे. या घटनेमुळे संपूर्ण परिसरात खळबळ उडाली आहे.

व्हिडीओद्वारे धक्कादायक खुलासा

सुरुवातीला हा सामूहिक आत्महत्येचा प्रयत्न असावा असा संशय व्यक्त केला जात होता. मात्र, रुग्णालयात उपचार घेत असलेल्या सनोज कुमारने एका व्हिडिओद्वारे धक्कादायक खुलासा केला आहे. त्याने सांगितले की, त्यांनी आत्महत्येचा प्रयत्न केला नव्हता, तर केवळ नशा करण्यासाठी 'फेराडोन' या कीटकनाशकाचे सेवन केले होते. या कीटकनाशकामुळे आपला जीव जाईल, याची पुसटशी कल्पनाही या तरुणांना नव्हती. नशेची ही कल्पना त्यांच्या जीवावर बेतली आहे.

तिघांचा मृत्यू

या दुर्घटनेत मुरारी कुमार, सन्नी देओल आणि राजा कुमार या तीन तरुणांनी आपला जीव गमावला आहे. मृत मुरारी हा कुटुंबातील मोठा मुलगा होता आणि त्याला नृत्याची आवड होती. तर सन्नी देओल हा घराचा एकुलता एक मुलगा असून त्याचे अवघ्या सहा महिन्यांपूर्वीच लग्न झाले होते. तिसरा मृत तरुण राजा कुमार हा दोन लहान मुलींचा बाप होता आणि मजुरी करुन कुटुंबाचा उदरनिर्वाह करत होता. या तिघांच्या मृत्यूमुळे त्यांच्या कुटुंबावर दुःखाचा डोंगर कोसळला आहे.

हे ही वाचा : अंधार पडलाय म्हणून रात्री घरी राहिले अन् मावसबहि‍णींवर केला बलात्कार; हादरवून टाकणारं प्रकरण

एसआयटी स्थापन

घटनेचे गांभीर्य लक्षात घेऊन जिल्हाधिकारी दीपेश कुमार आणि एसपी हिमांशू यांनी स्वतः घटनास्थळाची पाहणी केली आहे. पोलिसांनी या प्रकरणाच्या सखोल चौकशीसाठी एसआयटी स्थापन केली असून एफएसएल टीमनेही पुरावे गोळा केले आहेत. नशा म्हणून विषारी पदार्थ घेण्याचे हे प्रकरण चिंताजनक असून, पोलीस या घटनेच्या मुळाशी जाण्याचा प्रयत्न करत आहेत.