पत्नी आणि पोलीस उपनिरीक्षकाच्या कथित अनैतिक संबंधामुळे पोलीस कर्मचाऱ्याने केले नको ते?

२८ एप्रिलला केली होती आत्महत्या

मिळालेल्या माहितीनुसार, श्रीराम मिसाळ यांनी २८ एप्रिल रोजी मध्यरात्रीच्या सुमारास त्यांच्या राहत्या घराच्या टेरेसवर नायलॉनच्या दोरीच्या सहाय्याने गळफास घेऊन आत्महत्या केली होती. सुरुवातीला आत्महत्येमागील नेमके कारण स्पष्ट झाले नव्हते. मात्र, कुटुंबीयांनी व्यक्त केलेल्या संशयानंतर पोलिसांनी या प्रकरणाचा सखोल तपास सुरू केला.

मृताच्या भावाची तक्रार, पत्नीविरोधात गुन्हा

श्रीराम मिसाळ यांचे भाऊ लक्ष्मण माणिक मिसाळ (रा. तांबेवाडी, ता. शिरूर कासार, जि. बीड) यांनी दिलेल्या फिर्यादीच्या आधारे श्रीराम यांच्या पत्नी शिवगंगा महादेव शिरसाठ उर्फ शिवगंगा श्रीराम मिसाळ यांच्याविरुद्ध भारतीय न्याय संहिता (BNS) २०२३ च्या कलम १०८ अंतर्गत आत्महत्येस प्रवृत्त केल्याचा गुन्हा दाखल करण्यात आला आहे.

विवाहानंतर सातत्याने मानसिक छळाचा आरोप

एफआयआरनुसार, श्रीराम आणि शिवगंगा यांचा विवाह २०११ मध्ये झाला होता. विवाहानंतर पत्नीने सातत्याने मानसिक त्रास दिला, असा आरोप फिर्यादीत करण्यात आला आहे. यामध्ये वारंवार अपमानास्पद वागणूक देणे, कौटुंबिक वाद निर्माण करणे, धमक्या देणे आणि मानसिक छळ करणे यांसारख्या बाबींचा उल्लेख करण्यात आला आहे.

कथित अनैतिक संबंधांचा आरोप

या प्रकरणातील सर्वात गंभीर बाब म्हणजे एफआयआरमध्ये एका सहकारी पोलिस अधिकाऱ्यासोबत कथित अनैतिक संबंध असल्याचा दावा करण्यात आला आहे. या कथित संबंधांमुळे पती-पत्नीमधील वाद अधिक तीव्र झाल्याचा आरोप फिर्यादीत करण्यात आला आहे. या कारणामुळे श्रीराम मिसाळ मानसिकदृष्ट्या खचले होते, असेही तक्रारीत नमूद करण्यात आले आहे.

कुटुंबीयांना खोट्या गुन्ह्यात अडकविण्याच्या धमक्या?

फिर्यादीत आणखी एक गंभीर आरोप करण्यात आला आहे. मृताच्या कुटुंबीयांना खोट्या गुन्ह्यांमध्ये अडकविण्याच्या धमक्या देण्यात आल्याचा दावा करण्यात आला आहे. या धमक्यांमुळे संपूर्ण कुटुंब तणावाखाली असल्याचेही तक्रारीत म्हटले आहे.

ऑडिओ आणि कॉल रेकॉर्डिंग पोलिसांकडे

लक्ष्मण मिसाळ यांनी आपल्या तक्रारीसोबत काही ऑडिओ रेकॉर्डिंग, कॉल रेकॉर्डिंग तसेच अन्य पुरावे पोलिसांकडे सादर केल्याचा दावा केला आहे. या पुराव्यांची सत्यता आणि त्यातील मजकुराची पडताळणी तपासादरम्यान केली जाणार असल्याची माहिती पोलिस सूत्रांकडून देण्यात आली आहे.

पोलिस उपनिरीक्षकासह अन्य व्यक्तींच्या चौकशीची मागणी

एफआयआरमध्ये नमूद करण्यात आलेल्या आरोपांच्या पार्श्वभूमीवर किरण फुले नावाच्या महिलेची तसेच पोलिस उपनिरीक्षक संगप्पा भुजबळ यांची सखोल चौकशी करण्यात यावी, अशी मागणी मृताच्या भावाने केली आहे. या प्रकरणात त्यांचा काही संबंध आढळल्यास त्यांच्याविरोधातही योग्य ती कारवाई करण्यात यावी, अशी मागणी करण्यात आली आहे.

तपास सुरू

सध्या या प्रकरणाचा तपास विष्णूनगर पोलिस ठाण्याचे वरिष्ठ पोलिस निरीक्षक राम चोपडे यांच्या मार्गदर्शनाखाली सुरू आहे. एफआयआरमध्ये करण्यात आलेल्या आरोपांची सत्यता, सादर करण्यात आलेले पुरावे आणि संबंधित व्यक्तींची भूमिका याबाबत पोलिसांकडून तपास केला जात असून, तपासानंतरच संपूर्ण सत्य समोर येणार आहे.

दरम्यान, या प्रकरणातील सर्व आरोप हे फिर्यादीत नमूद केलेल्या दाव्यांवर आधारित असून, त्यांची अधिकृत पडताळणी आणि तपास प्रक्रिया अद्याप सुरू आहे.