भर मैदानात कबड्डीपटूवर झाडल्या गोळ्या, सेल्फी हवा म्हणून जवळ आले अन्…

प्रत्यक्षदर्शींच्या मते, २-३ अज्ञात व्यक्ती मोटारसायकलवर आल्या आणि सेल्फी काढण्याच्या बहाण्याने राणा बलाचौरिया यांच्या जवळ गेले. जेव्हा राणा थांबले, तेव्हा हल्लेखोरांनी अचानक त्यांच्यावर जवळून ४-५ गोळ्या झाडल्या. गोळ्या त्यांच्या चेहऱ्यावर आणि डोक्यावर लागल्या. याशिवाय, दहशत पसरवण्यासाठी हल्लेखोरांनी हवेतही गोळीबार केला. गोळीबाराच्या आवाज हा सुरुवातीला लोकांना फटाके असल्याचे वाटले, पण काही क्षणातच मैदानात गोंधळ माजला आणि प्रेक्षक इकडेतिकडे पळू लागले.

राणा बलाचौरिया यांना तात्काळ मोहालीतील फोर्टिस रुग्णालयात नेण्यात आले, मात्र उपचाराआधीच त्यांचा मृत्यू झालेला असल्याने रुग्णालयाने त्यांना मृत घोषित केले.

गँगवारशी संबंधित कारण?

सोशल मीडियावर एका पोस्टने या हत्येची जबाबदारी घेतली आहे. ही पोस्ट बंबीहा गँगशी संबंधित असल्याचे सांगितले जाते. पोस्टमध्ये दावा करण्यात आला आहे की, राणा बलाचौरिया यांनी गायक सिद्धू मूसेवाला हत्याकांडातील आरोपींना आश्रय दिला होता आणि ते लॉरेन्स बिश्नोई गँगच्या विरोधात काम करत होते. तसेच, ते गँगस्टर जग्गू झोटी आणि हॅरी टॉट यांच्यासोबत होते. या बदल्याची ही कारवाई असल्याचे पोस्टमध्ये म्हटले आहे. पोस्टमध्ये डोनी बाल शगनप्रीत, मोहब्बत रंधावा, अमर खेवा प्रभदासुवाल आणि कौशल चौधरी यांनी जबाबदारी घेतली असून, प्रत्यक्ष गोळीबार मख्खन अमृतसर आणि डिफॉल्टर करण यांनी केला असल्याचे नमूद आहे.

पोलिसांनी मात्र या पोस्टची अधिकृत पुष्टी केलेली नाही. मोहालीचे वरिष्ठ पोलिस अधीक्षक (एसएसपी) हरमंदीप सिंग हंस यांनी सांगितले की, हल्लेखोरांनी जवळून गोळ्या झाडल्या आहेत. सीसीटीव्ही फुटेज तपासले जात आहे, सोशल मीडिया पोस्ट्स स्कॅन केल्या जात आहेत आणि गँग लिंक्सची शक्यता तपासली जात आहे. स्पर्धेत एका प्रसिद्ध पंजाबी गायकाच्या येण्याची अपेक्षा होती, ज्यामुळे गर्दी जास्त होती, आणि या गायकाशी संबंधित कोणतीही शक्यता तपासली जात आहे.

राजकीय प्रतिक्रिया

या घटनेने पंजाबमध्ये राजकीय वादळ निर्माण केले आहे. शिरोमणी अकाली दलाचे अध्यक्ष आणि माजी उपमुख्यमंत्री सुखबीर सिंग बादल यांनी आम आदमी पार्टी (आप) सरकारवर जोरदार हल्ला चढवला. त्यांनी म्हटले की, पंजाबमध्ये कायदा-सुव्यवस्थेची पूर्णपणे दैना झाली आहे आणि गुंड सार्वजनिक कार्यक्रमांमध्ये निर्भीडपणे गोळीबार करत आहेत. इतर विरोधी नेत्यांनीही भगवंत मान सरकारला जबाबदार धरले आहे.

पंजाबमध्ये गेल्या काही वर्षांत कबड्डी खेळाडूंच्या हत्या वाढल्या आहेत, ज्या बहुतांश गँगवारशी जोडल्या जातात. ही घटना पुन्हा एकदा राज्यातील कायदा-सुव्यवस्थेवर प्रश्नचिन्ह उभे करत आहे. पोलिस तपास सुरू असून, लवकरच आरोपींना पकडले जाईल अशी अपेक्षा आहे.