मुंबई: पहिल्या पतीपासून पोटगीची मागणी; पण, दुसऱ्या पतीच्या साक्षीमुळे खटल्याचा निकाल पलटला अन्...

पतीकडून पोटगीची मागणी... 

मुंबईतील बोरीवली येथे असलेल्या मेजिस्ट्रेट कोर्टात हा खटला सुरू होता. 2009 मध्ये, महिलेने तिच्या पहिल्या पतीविरुद्ध घरगुती हिंसाचार कायद्याअंतर्गत गुन्हा दाखल केला होता. महिलेने केलेल्या आरोपानुसार, लग्नानंतर बरीच वर्षे सासरी तिचा शारीरिक आणि मानसिक छळ करण्यात आला. इतकेच नव्हे तर, तिला घराबाहेर सुद्धा काढण्यात आलं होतं. याची भरपाई म्हणून आणि तिच्या उदरनिर्वाहासाठी तिने तिच्या आधीच्या पतीकडून दरमहा एक ठराविक रकमेची मागणी केली होती. 

महिलेने तिच्या याचिकेत म्हटलं की तिचं 2005 मध्ये अरेन्ज्ड मॅरेज झालं होतं. लग्नानंतर तिला कळलं की तिचा पती आधीच विवाहित होता आणि त्याची पहिली पत्नी नेहमी त्यांच्या घरी यायची. तसेच, तिचा पती आणि त्याची पहिली पत्नी दोघेही तिच्यावर अत्याचार करत असल्याचा आरोपी महिलेने केला. महिलेने तिच्यावर कौटुंबिक हिंसाचार करण्यात आल्याचं कोर्टात सांगितलं. डिसेंबर 2009 मध्ये या प्रकरणाच्या सुनावणीदरम्यान, न्यायालयाने महिलेच्या बाजूने निकाल दिला आणि तिच्या पहिल्या पतीला पीडितेला दरमहा 3,200 रुपये द्यावे लागणार असल्याचा आदेश दिला. हा आदेश खटल्याचा अंतिम निकाल लागेपर्यंत लागू होता. 

हे ही वाचा: नांदेडमधील चौकोनी कुटुंब मृत्यूप्रकरणात ट्वीस्ट, आई-वडिलांचा खून केला अन् मुलांनी स्वत:ला रेल्वेखाली झोकून दिलं

महिलेच्या दुसऱ्या लग्नाशी संबंधित पुरावे सादर 

संबंधित महिलेची बहीण तिच्या आरोपांचं समर्थन करण्यासाठी न्यायालयात साक्षीदार म्हणून हजर झाली. बचाव पक्षाने महिलेच्या दुसऱ्या लग्नाशी संबंधित पुरावे सादर केले. मॅरेज सर्टिफिकेट आणि तिच्या सध्याच्या पतीची माहिती कोर्टात पुरावे म्हणून सादर करण्यात आली. त्यानंतर, महिलेचा सध्याचा पती न्यायालयात हजर झाला आणि त्याने कबूल केलं की तो तिच्याशी कायदेशीररित्या विवाहित आहे. त्याच्या साक्षीने महिलेच्या दुसऱ्या लग्नाची पुष्टी झाली. बचाव पक्षाने असा युक्तिवाद केला की महिलेने तिच्या पहिल्या पतीला घटस्फोट देऊन पुन्हा लग्न केलं असल्याने, तिला आता त्याच्याकडून पोटगी मिळू शकत नाही. 

हे ही वाचा: अजित पवारांच्या राष्ट्रवादीकडून नवाब मलिक यांच्या कुटुंबातील 3 जण निवडणुकीच्या रिंगणात

अतिरिक्त मुख्य न्यायदंडाधिकारी बी.एन. चिकणे यांनी त्यांच्या निर्णयात म्हटलं आहे की, "अर्जदाराने प्रतिवादी क्रमांक 1 पासून घटस्फोट घेतल्यानंतर पुनर्विवाह केल्याचं पुरावे आणि कागदपत्रांवरून स्पष्ट होत आहे. त्यामुळे, ती तिच्या आधीच्या पतीकडून पोटगी मागू शकत नाही." तसेच, महिलेने तिचा मूळ पोटगीचा दावा प्रलंबित असताना दुसरं लग्न केलं आणि यामुळे तिच्या आधीच्या पतीवर अवलंबून राहण्याचा तिचा कायदेशीर अधिकार रद्द झाल्याचं न्यायालयाने म्हटलं.