PAK मध्ये 'धुरंधर' राडा... उझैर बलोचच्या भावावर 'ल्यारी'मध्येच धडाधडा झाडल्या गोळ्या!

उझैर बलोचच्या भावावर कोणी झाडल्या गोळ्या?

कराची दक्षिण विभागाचे उपमहानिरीक्षक (DIG) यांच्या मते, जखमींपैकी एक जण बंदी घातलेल्या 'पीपल्स अमन कमिटी'चा प्रमुख उझैर बलोचचा भाऊ झुबेर बलोच असू शकतो. पोलिसांनी सांगितले की, त्याच्या ओळखीची अद्याप अधिकृतपणे पुष्टी केली जात आहे.

पाकिस्तानी वृत्तपत्र 'डॉन'मधील वृत्तानुसार, मोटारसायकलवरून आलेल्या हल्लेखोरांनी आपले चेहरे झाकले होते आणि एका दुकानदाराने हल्लेखोरांवर प्रतिहल्ला केल्यानंतर ते पळून गेले. वरिष्ठ पोलीस अधिकारी सय्यद असद रझा यांनी सांगितले की, त्यावेळी झुबेर बलोच आपल्या घराबाहेर होता.

हे ही वाचा>> डिलिव्हरी पार्टनरचा महिलेकडे घरात येऊ देण्याचा हट्ट! पुढे सगळं अंगलट आलं अन्...

भारतीय अभिनेता दानिश पंडोरने 2026 च्या 'धुरंधर' या भारतीय स्पाय-थ्रिलरमध्ये उझैर बलोचची भूमिका साकारली होती, तर अक्षय खन्नाने उझैर बलोचचा उस्ताद रहमान डकैत या दरोडेखोराची भूमिका साकारली होती.

मिळालेल्या माहितीनुसार, झुबेर बलोचला 2012 मध्ये अटक करण्यात आली होती आणि गेल्या वर्षी जानेवारीमध्ये त्याची सुटका झाली. मिळालेल्या माहितीनुसार, पोलीस या घटनेचा तपास टोळीयुद्ध आणि वैयक्तिक शत्रुत्व यासह अनेक बाजूंनी करत आहेत.

झुबेर बलोचवर झालेल्या गोळीबारानंतर टोळीयुद्ध पुन्हा सुरू होण्याची भीती स्थानिक रहिवाशांना वाटत आहे. या हल्ल्यानंतर ल्यारीमधील लोक आता झुबेर बलोचच्या प्रकृतीबद्दल माहिती मिळवण्याचा प्रयत्न करत आहेत. कराची पोलीस या घटनेवर मौन बाळगून आहेत.

हे ही वाचा>> 'थोरल्या मुलाने माझ्यावर बलात्कार केलाय...' आईचा गंभीर आरोप, पुढं काय घडलं?

ल्यारीमधील एका सामाजिक कार्यकर्त्याने 'डॉन'ला सांगितले की, झुबेर बलोच काही महिन्यांपूर्वी एका "राजकीय पक्षात" सामील झाला होता आणि त्याने परिसरात त्या पक्षाचे झेंडेही लावले होते.

त्या सामाजिक कार्यकर्त्याने असेही सांगितले की, कराची ऑपरेशननंतर दुबई आणि इराणला पळून गेलेले काही गुंड अमेरिका-इराण युद्धानंतर परत आले आहेत, अशा अफवा आहेत.

कराचीच्या ल्यारी गँगची कहाणी

कराचीच्या ल्यारी गँगची कहाणी ही ड्रग्ज, खंडणी आणि राजकीय आश्रयाची एक रक्तरंजित गाथा आहे. 1960 आणि 1980 च्या दशकात, काला नाग, दादल (रहमान डकेतचे वडील) आणि शेरू यांसारख्या सुरुवातीच्या गुंडांचे ड्रग्जच्या व्यापारावर वर्चस्व होते. 'धुरंधर' या चित्रपटातही या पैलूला स्पर्श केला आहे. नंतर, हाजी लालू आणि बाबू डाकेत यांचा उदय झाला. दादलच्या हत्येनंतर, त्याचा मुलगा अब्दुर रहमान बलोच, उर्फ रहमान डाकेत, याने सत्ता मिळवली आणि तो कराचीचा डॉन बनला.

लालूचा मुलगा, अर्शद पप्पू याच्याशी असलेल्या शत्रुत्वामुळे 2003 मध्ये एक भीषण टोळीयुद्ध सुरू झाले. 2008 मध्ये, रहमानने पीपल्स अमन कमिटी (पीएसी) ची स्थापना केली, जी पीपीपीच्या आश्रयाखाली ल्यारीवर राज्य करत होती. ऑगस्ट 2009 मध्ये पोलीस चकमकीत रहमानच्या मृत्यूनंतर, त्याचा चुलत भाऊ, उझैर बलोच याने नेतृत्व स्वीकारले. उझैरने 2013 मध्ये अर्शद पप्पूच्या हत्येचा कट रचला. नंतर, टोळीच्या नियंत्रणावरून उझैर बलोचचाही इतरांशी संघर्ष झाला. रेंजर्सच्या एका कारवाईनंतर त्याला अटक करण्यात आली.