वाशीम : पत्नीच्या थंड डोक्याचा अंदाज आला नाही, प्रियकराच्या मदतीने केला गेम

हेही वाचा : 'जेन झी'नं सनातन धर्म जगला, गीतांजली आंगमो यांचं वक्तव्य; आता अभिजीत दिपकेंची पहिली प्रतिक्रिया

मृतदेह शेतात आढळून आल्यानंतर खळबळ, अखेर हत्येचं कारण समोर 

पोलिसांनी दिलेल्या माहितीनुसार, अमानी येथील सुरेश झलके हे पत्नीसह वाकळवाडी येथे सासरी वास्तव्यास होते. काल त्यांचा मृतदेह शेतात आढळून आल्यानंतर परिसरात एकच खळबळ उडाली होती. या घटनेची माहिती मिळताच मेडशी पोलिस चौकी आणि मालेगाव पोलीस घटनास्थळी दाखल झाले. सुरुवातीला मृत्यूचे नेमके कारण स्पष्ट झाले नव्हते. मात्र घटनास्थळावरील पुरावे आणि त्यानंतर करण्यात आलेल्या चौकशीच्या आधारे पोलिसांनी तपासाची सूत्रे वेगाने हलवली.

हेही वाचा : विरोधी पक्षांना यश येत नाही, मग सीजेपीच्या आंदोलनालाच यश का आलं? अभिजीत दिपकेंचं उत्तर ऐकाच

गोड बोलून शेतात बोलावलं अन् पतीचा केला गेम 

तपासादरम्यान सुरेश झलके यांचा पत्नीच्या प्रेमसंबंधांना विरोध असल्याचे समोर आल्याचा पोलिसांचा दावा आहे. त्यातूनच पत्नी आशा झलके आणि तिचा प्रियकर महादेव अंभोरे यांनी सुरेश यांच्या हत्येचा कट रचल्याचे पोलिसांनी सांगितले. योजनेनुसार आशा झलके यांनी सुरेश यांना बहाण्याने शेतात बोलावले. तेथे आधीपासूनच महादेव अंभोरे उपस्थित होता. त्यानंतर दोघांनी मिळून सुरेश यांचा गळा आवळून खून केल्याचा पोलिसांचा दावा आहे.

हत्येनंतर कोणालाही संशय येऊ नये, यासाठी सुरेश झलके यांचा मृतदेह शेतातील लिंबाच्या झाडाखाली टाकून देण्यात आल्याचेही पोलिसांनी सांगितले. घटनास्थळावरील पुरावे आणि चौकशीच्या आधारे पोलिसांनी आशा झलके व महादेव अंभोरे या दोघांना अटक केली. दोघांविरुद्ध खुनाचा गुन्हा दाखल करण्यात आला असून या प्रकरणाचा पुढील तपास मालेगाव पोलीस करत आहेत.