पत्नीच्या WhatsApp स्टेटसवर तरुणाची अश्लील कमेंट; संतापलेला पती जाब विचारायला गेला, पण त्याचीच झाली हत्या

नेमकं प्रकरण काय?

मिळालेल्या माहितीनुसार, नालासोपारा पूर्व येथील प्रगती नगर भागात आफताब शेख (वय 24) हा तरुण त्याची पत्नी शबाना शेख (22) हिच्यासोबत राहत होता. शुक्रवारी या दाम्पत्याच्या लग्नाचा वाढदिवस होता. या खास दिनानिमित्त शबाना हिने आपल्या व्हॉट्सअ‍ॅपवर एक स्टेटस ठेवले होते. हे स्टेटस पाहून मेहंदी हसन शेख (2) या तरुणाने त्यावर अत्यंत आक्षेपार्ह आणि अश्लील कमेंट केली. केवळ स्टेटसवर कमेंट करून मेहंदी थांबला नाही, तर त्याने इंस्टाग्रामवरही शबानाला अश्लील भाषेत शिवीगाळ केली. आपल्या पत्नीबद्दल असे घाणेरडे शब्द वापरल्याचे समजताच आफताब संतापला. या प्रकरणाचा जाब विचारण्यासाठी आफताब आणि शबाना शुक्रवारी पहाटे साडेचारच्या सुमारास नालासोपारा पश्चिम येथील हनुमान नगर परिसरात असलेल्या मेहंदी हसनच्या घरी पोहोचले.

हेही वाचा : कल्याण : 7 वर्षांचा खुशील अंगणात खेळत होता, भटका कुत्रा चावल्याने जीव गेला, वाचवण्यासाठी आलेल्या मित्रालाही...

वाद विकोपाला गेला आणि रक्ताचा सडा पडला

सुरुवातीला दोघांमध्ये शाब्दिक चकमक झाली. मात्र, रागाच्या भरात असलेल्या मेहंदी हसनने अचानक चाकू बाहेर काढला आणि आफताबवर एकामागून एक अनेक वार केले. हा हल्ला इतका भीषण होता की, आफताब रक्ताच्या थारोळ्यात कोसळला आणि त्याचा जागीच मृत्यू झाला. लग्नाच्या वाढदिवसाच्या पहाटेच शबानासमोर तिच्या पतीची निर्घृण हत्या झाल्याने सर्वत्र खळबळ उडाली आहे.

आरोपीचा गुन्हेगारी इतिहास

घटनेची माहिती मिळताच नालासोपारा पोलिसांनी तातडीने तपासाची चक्रे फिरवून आरोपी मेहंदी हसन शेख याला अटक केली आहे. तपासात समोर आलेली माहिती अधिक धक्कादायक आहे. आरोपी मेहंदी हा सराईत गुन्हेगार असून यापूर्वी त्याच्यावर पॉक्सो (POCSO) कायद्यांतर्गत गुन्हा दाखल झाला होता आणि त्याला अटकही झाली होती. मृत आफताब आणि आरोपी मेहंदी हे पूर्वी एकमेकांचे शेजारी होते, अशी माहितीही समोर आली आहे.

 "व्हॉट्सअ‍ॅप स्टेटसवरून झालेल्या वादातून ही हत्या झाली आहे. आम्ही आरोपीला अटक केली असून पुढील तपास सुरू आहे," अशी माहिती नालासोपारा पोलीस ठाण्याचे वरिष्ठ पोलीस निरीक्षक विशाल वलवी यांनी दिली.

सोशल मीडियाचा अतिवापर आणि वाढता हिंसाचार

छोट्याशा कारणावरून किंवा सोशल मीडियावरील कमेंटवरून टोकाचे पाऊल उचलण्याच्या घटनांमध्ये वाढ होत आहे. एका स्टेटसमुळे एका तरुणाचा बळी गेला आणि एका महिलेचे कुंकू पुसले गेले. या घटनेमुळे नालासोपारा परिसरात दहशतीचे वातावरण असून, गुन्हेगारांवर कठोर कारवाई करण्याची मागणी स्थानिक नागरिकांकडून केली जात आहे.

इतर महत्त्वाच्या बातम्या 

23 वर्षीय तरुणीवर एकाच दिवशी दोन वेगवेगळ्या ठिकाणी बलात्कार... नंतर, चौथ्या मजल्यावरून खाली पाडून निर्दयी हत्या!