शाळेच्या संचालकाच्या बायकोचे ड्रायव्हरसोबत अनैतिक संबंध; बेडवर विषारी साप सोडून खून

हेही वाचा : नरेंद्र मोदी हुकूमशाह; आजवर एवढा वाईट पंतप्रधान झाला नाही, अभिजीत दिपकेंचा जोरदार हल्लाबोल

अनैतिक संबंधातून नवऱ्याला संपवलं, 20 लाखांच्या इन्सुरन्सवर डोळा 

पोलिसांनी दिलेल्या माहितीनुसार, भंडोरा गावातील 35 वर्षीय अतुल पंवार आणि त्याची पत्नी दामिनी हे हस्तिनापूरमधील रामलीला मैदान परिसरात कृष्णा किड्स पब्लिक स्कूल चालवत होते. दोघांनी 2019 मध्ये प्रेमविवाह केला होता. शुक्रवारी सकाळी दामिनी हिने पतीला साप चावल्याची माहिती देत त्याला हस्तिनापूर येथील सामुदायिक आरोग्य केंद्रात नेले. मात्र डॉक्टरांनी त्याला मृत घोषित केले. घटनास्थळी अतुलच्या बेडमध्ये सापही आढळल्याने पोलिसांना संशय आला. त्यामुळे मृतदेह शवविच्छेदनासाठी पाठवून तपास सुरू करण्यात आला. तपासादरम्यान दामिनीच्या मोबाईलची कॉल डिटेल आणि तांत्रिक पुराव्यांची छाननी करण्यात आली. त्यामध्ये शाळेचा ड्रायव्हर तुषार उर्फ निक्की याच्याशी तिचा सतत संपर्क असल्याचे समोर आले. चौकशीत तुषारने दामिनीसोबत प्रेमसंबंध असल्याचे आणि दोघांनी मिळून अतुलच्या हत्येचा कट रचल्याची कबुली दिल्याचे पोलिसांनी सांगितले.

हेही वाचा : दूधात भेसळ ते अस्वच्छता, तुकाराम मुंढेंनी मुंबईत 5 हॉटेल्सचा बाजार उठवला..

दुधातून झोपेच्या गोळ्या दिल्या, अन् नंतर विषारी साप सोडला 

पोलिसांच्या तपासानुसार, गुरुवारी रात्री अतुलला दुधामध्ये झोपेच्या गोळ्यांचा जास्त डोस देण्यात आला. त्यामुळे तो गाढ झोपेत गेल्यानंतर तुषारने सोनू आणि उदय यांच्या मदतीने विषारी साप खोलीत आणून अतुलच्या अंगावरील ब्लँकेटमध्ये सोडला. त्यानंतर सापाने अतुलला चावा घेतल्याने त्याचा मृत्यू झाला. तपासात अतुलच्या नावावर सुमारे 20 लाख रुपयांचा विमा असल्याचेही समोर आले. विम्याची रक्कम मिळाल्यानंतर या कटात मदत करणाऱ्या सोनू आणि उदय यांना पाच लाख रुपये देण्याचे आश्वासन देण्यात आले होते, असे पोलिसांनी सांगितले. याशिवाय सुमारे 20 दिवसांपूर्वी तुषारने अतुलला अर्टिगा कारने धडक देऊन ठार मारण्याचाही प्रयत्न केला होता. मात्र त्यावेळी अतुलने हेल्मेट घातले असल्यामुळे तो बचावला होता.

या प्रकरणाचा उलगडा करताना मेरठचे वरिष्ठ पोलीस अधीक्षक अविनाश पांडे यांनी सांगितले की, अतुल पंवार यांचा संशयास्पद मृत्यू झाल्याची माहिती मिळाल्यानंतर पोलीस घटनास्थळी पोहोचले. त्यावेळी कुटुंबीयांनी, विशेषतः पत्नीने, साप चावल्यामुळे मृत्यू झाल्याचे सांगितले होते. मात्र घटनास्थळावरील परिस्थिती आणि सापाच्या हालचाली संशयास्पद वाटल्याने तांत्रिक तपास सुरू करण्यात आला. मोबाईलमधील पुरावे, तांत्रिक सर्व्हिलन्स आणि चौकशीदरम्यान आरोपींच्या मोबाईलमध्ये डब्यात ठेवलेल्या सापाचा फोटोही आढळला. त्यानंतर तुषारने दोन साप पकडणाऱ्यांकडून हा साप विकत घेतल्याचे सांगितले. दामिनीने पतीचा खून करून विम्याचे पैसे मिळवण्याचा आणि त्यानंतर तुषारने आपल्या पत्नीला घटस्फोट देऊन दामिनीसोबत विवाह करण्याचा कट रचल्याचेही तपासात समोर आले आहे. पोलिसांनी जप्त केलेला साप तपासणीसाठी पाठवला असून या संपूर्ण प्रकरणाचा पुढील तपास सुरू आहे. मेरठच्या हस्तिनापूर पोलीस ठाण्याच्या हद्दीत ही घटना घडली.