ब्युटी पार्लरचं ओपनिंग 6 दिवसांवर येऊन ठेपलं.., अनेक वर्षांचं स्वप्न पूर्ण होणार असतानाच शिल्पाचा मृतदेह सापडला

 पतीची दारूची सवय आणि चाकूने हल्ल्याचा जुना इतिहास

शिल्पाच्या माहेरच्यांनी पती प्रिन्सवर अत्यंत गंभीर आरोप केले आहेत. त्यांच्या मते, प्रिन्स हा दारूच्या आहारी गेला होता आणि नशेच्या धुंदीत तो वारंवार शिल्पाला मारहाण करत असे. हा वाद इतका विकोपाला गेला होता की अनेकदा हे प्रकरण पोलीस ठाण्यापर्यंत आणि न्यायालयापर्यंतही पोहोचले होते. धक्कादायक बाब म्हणजे, प्रिन्सने यापूर्वीही शिल्पावर चाकूने प्राणघातक हल्ला केला होता. पतीकडून सातत्याने होणाऱ्या या शारीरिक आणि मानसिक त्रासामुळे शिल्पा कमालीची त्रस्त होती. प्रत्येक वेळी मुलांच्या भविष्याचा विचार करून आणि संसार वाचवण्याच्या आशेने ती तडजोड करून सासरी परतत असे, परंतु प्रिन्सच्या वागण्यात कोणताही बदल झाला नाही. वारंवार मिळणाऱ्या धमक्यांमुळे ती काही काळासाठी आपल्या वडिलांकडे मुंबईला निघून गेली होती आणि पुन्हा सासरी येण्यास तयार नव्हती.

हेही वाचा : डोंबिवली हत्याकांडाचा मास्टरमाइंड अडीच वर्षांनी जेरबंद ! वेश बदलून नांदेडच्या शेतात करत होता काम, पोलिसांनी अखेर आवळल्या मुसक्या

नवीन सुरुवातीचे आश्वासन ठरले खोटे; पार्लरच्या उद्घाटनापूर्वीच शेवट

शिल्पा सासरी परतत नसल्याचे पाहून प्रिन्स आणि त्याच्या कुटुंबीयांनी तिला परत आणण्यासाठी गयावया केली होती. आपण दारू सोडून देऊ, माहेरून पैसे मागणार नाही आणि तुला स्वतःचे ब्यूटी पार्लर उघडून देऊ, असे आश्वासन त्यांनी दिले होते. या नवीन सुरुवातीच्या आशेवर विश्वास ठेवून शिल्पा केवळ 20 दिवसांपूर्वीच मुंबईहून परतली होती. तिच्या ब्यूटी पार्लरचे उद्घाटन 30 एप्रिल रोजी होणार होते, ज्यासाठी तिने तयारीही केली होती. मात्र, नव्या आयुष्याचे स्वप्न पूर्ण होण्यापूर्वीच शिल्पाचा मृतदेह राहत्या घरात गळफास घेतलेल्या अवस्थेत आढळला. पतीने दिलेली आश्वासने केवळ तिला परत बोलावण्यासाठी रचलेला एक बनाव होता का, असा प्रश्न आता उपस्थित केला जात आहे.

भावाचा हत्येचा आरोप आणि पोलीस तपासाची दिशा

शिल्पाच्या मृत्यूची बातमी समजताच तिच्या मावस भावाने घटनास्थळी धाव घेतली आणि ही आत्महत्या नसून हत्या असल्याचा स्पष्ट आरोप केला. बहिणीचा छळ गेल्या अनेक दिवसांपासून सुरू होता आणि पतीनेच तिला संपवले असावे, असा संशय नातेवाईकांनी व्यक्त केला आहे. घटनेची माहिती मिळताच पोलिसांनी घटनास्थळ गाठून मृतदेह ताब्यात घेतला आणि शवविच्छेदनासाठी पाठवला. पोलीस अधिकाऱ्यांच्या म्हणण्यानुसार, शवविच्छेदन अहवाल प्राप्त झाल्यानंतरच मृत्यूचे नेमके कारण स्पष्ट होईल. सध्या पोलीस या प्रकरणातील सर्व तांत्रिक आणि कौटुंबिक पैलूंची तपासणी करत असून, आरोपी पतीचीही चौकशी केली जात आहे. या घटनेमुळे संपूर्ण परिसरात हळहळ व्यक्त केली जात आहे.

इतर महत्त्वाच्या बातम्या 

डोंबिवली हत्याकांडाचा मास्टरमाइंड अडीच वर्षांनी जेरबंद ! वेश बदलून नांदेडच्या शेतात करत होता काम, पोलिसांनी अखेर आवळल्या मुसक्या