आमदार अतुल भोसले अन् पृथ्वीराज चव्हाण दोघांच्याही गटांचा कराड नगरपालिकेत पराभव, नेमकं काय घडलं?

नगराध्यक्षपदासाठी झालेल्या थेट लढतीत राजेंद्रसिंह यादव (यशवंत विकास आघाडी) यांना 24,096 मते मिळाली. त्यांच्यापाठोपाठ भाजपचे उमेदवार विनायक पावसकर यांना 14,361 अपक्ष रणजीतनाना पाटील यांना 6651, काँग्रेसचे झाकीर पठाण यांना 2309, अपक्ष गणेश कापसे यांना 453, बापू लांडगे यांना 126 मते मिळाली, तर 268 मतदारांनी नोटाचा वापर केला.

या निकालामुळे कराडमध्ये काँग्रेस आणि भाजप या दोन्ही पक्षांची मोठी पीछेहाट झाली आहे. माजी मुख्यमंत्री पृथ्वीराज चव्हाण यांच्या प्रभावाखालील काँग्रेस गट अपेक्षेपेक्षा खूपच मागे राहिला, तर आमदार अतुल भोसले यांच्या नेतृत्वाखालील भाजपलाही नगराध्यक्षपदावर आपली पकड कायम ठेवता आली नाही. स्थानिक पातळीवर मतांचे विभाजन, आघाड्यांचे राजकारण आणि अपक्ष उमेदवारांची ताकद यामुळे हे चित्र निर्माण झाल्याचे बोलले जात आहे.

हेही वाचा : घायल हू इसलिये घातक हूं, भाजपचा दारुण पराभव केल्यानंतर मोहिते पाटलांची 'धुरंदर' डायलॉगबाजी अन् डान्स VIDEO

दुसरीकडे, शिवसेना शिंदे गट, यशवंत विकास आघाडी आणि शरदचंद्र पवार राष्ट्रवादीच्या लोकशाही आघाडीने एकत्र येत राजेंद्रसिंह यादव यांना संयुक्त उमेदवार म्हणून उभे केले होते. “कराड शहराच्या शांततामय सहजीवनासाठी मतदान करा” या आवाहनाला कराडकरांनी सकारात्मक प्रतिसाद दिल्याचे या निकालातून स्पष्ट झाले आहे.

विजयानंतर राजेंद्रसिंह यादव यांचे औक्षण करण्यात आले. कार्यकर्त्यांनी फटाके फोडून, गुलाल उधळत जल्लोष साजरा केला. यादव यांच्याशी बातचीत केली असता, त्यांनी हा विजय कराडच्या जनतेचा विश्वास असल्याचे सांगत सर्व घटकांना सोबत घेऊन शहराच्या विकासासाठी काम करण्याची ग्वाही दिली.

दरम्यान, शरदचंद्र पवार राष्ट्रवादी काँग्रेसचे माजी मंत्री बाळासाहेब पाटील यांनी प्रतिक्रिया देताना सांगितले की, कराडच्या शांतता, सलोखा आणि विकासाच्या विचाराला मतदारांनी पाठिंबा दिला आहे. लोकशाही आघाडीचा हा विजय असून येत्या काळात कराडच्या सर्वांगीण विकासावर भर दिला जाईल, असा विश्वास त्यांनी व्यक्त केला. एकूणच कराड नगरपालिकेच्या या निकालाने स्थानिक राजकारणाची दिशा बदलली असून, भाजप आणि काँग्रेससाठी हा निकाल आत्मपरीक्षणाची संधी मानला जात आहे, तर शिंदे शिवसेना आणि मित्रपक्षांसाठी हा विजय ताकद वाढवणारा ठरला आहे.

इतर महत्त्वाच्या बातम्या 

संजयकाका पाटलांनी विधानसभेतील पराभवाचा बदला घेतला, रोहित पाटलांच्या गटाचा तासगाव नगरपालिकेत पराभव