Amol Kirtikar : "घोटाळेबाज, लाचखोर", काँग्रेस नेत्याचेच गंभीर आरोप, ठाकरेंचा उमेदवार वादात

Amol Kirtikar Sanjay Nirupam : महाविकास आघाडीचे जागावाटप होण्यापूर्वीच उद्धव ठाकरे यांनी शिवसेनेच्या (उद्धव बाळासाहेब ठाकरे) पहिल्या उमेदवारांच्या नावाची घोषणा केली. यामुळे उत्तर पश्चिम मुंबई लोकसभा मतदारसंघातून अमोल कीर्तीकर यांना उमेदवारी देण्यात आल्याने वादाची पहिली ठिणगी पडली आहे. काँग्रेसचे नेते संजय निरुपम यांनी थेट अमोल कीर्तीकर यांना घोटाळेबाज म्हटले आहे. (Congress Leader Sanjay Nirupam Targets Shiv Sena UBT Candidate's Amol Kirtikar)

उत्तर पश्चिम मुंबई लोकसभा मतदारसंघातून काँग्रेसचे संजय निरुपम हे इच्छुक आहेत. ते यासाठी सातत्याने प्रयत्न करत आहे. पण, उद्धव ठाकरे यांनी जागावाटप निश्चित होण्यापूर्वीच उमेदवारांच्या नावाची घोषणा केल्याने संजय निरुपम नाराज झाले आहेत. त्यांची नाराजी व्यक्त करताना त्यांनी अमोल कीर्तिकर यांच्यावर भ्रष्टाचाराचे आरोप केले आहेत. 

संजय निरुपम यांची पोस्ट वाचा जशीच्या तशी

निरुपम यांनी सोशल मीडियावर एक पोस्ट केली आहे. त्यात ते म्हणतात, "काल सायंकाळी शिल्लक राहिलेल्या शिवसेनेच्या प्रमुखांनी अंधेरीत उत्तर पश्चिम लोकसभा मतदारसंघातून महाविकास आघाडीच्या उमेदवाराची घोषणा केली."

"रात्रीपासूनच फोन येत आहेत. असे कसे होऊ शकते? महाविकास आघाडीच्या दोन डझनाहून जास्त बैठका होऊनही जागावाटपाचा अंतिम निर्णय झालेला नाही. ज्या ८-९ जागांचा पेच आहे, त्यात हा मतदारसंघही  आहे, असे मला काँग्रेसच्या त्या सहकाऱ्यांनी सांगितले, जे जागावाटपाच्या बैठकांमध्ये सहभागी होत आहेत."

हेही वाचा >> "तुमचा नवरा मोदी-मोदी करत असेल, तर त्याला जेवण देऊ नका"

"मग शिवसेनेकडून उमेदवारांची घोषणा करणे आघाडी धर्माचं उल्लंघन नाहीये का? की काँग्रेसला कमी लेखण्यासाठी जाणीवपूर्वक ही गोष्ट केली जात आहे? काँग्रेस पक्षश्रेष्ठीने यात हस्तक्षेप करायला हवा."