Shreyas Talpade : घरी आला अन् बेशुद्ध पडला; हार्ट अटॅक आधी श्रेयससोबत काय घडलं?

Shreyas Talpade News in Marathi : अभिनेता श्रेयस तळपदेला ह्रदयविकाराचा झटका झाल्याची घटना समोर आली. त्याला तातडीने रुग्णालयात दाखल करण्यात आले. सध्या तो रुग्णालयात असून, सेलिब्रिटींसह त्याचे चाहते तो बरा व्हावा यासाठी प्रार्थना करत आहेत.

गुरुवारी (14 डिसेंबर) संध्याकाळी बॉलिवूडमधून धक्कादायक बातमी समोर आली. प्रसिद्ध अभिनेता श्रेयस तळपदेला हृदयविकाराचा झटका आला. त्यानंतर त्याला तातडीने मुंबईतील बेलेव्ह्यू रुग्णालयात दाखल करण्यात आले. डॉक्टरांनी श्रेयस तळपदेवर तातडीने अँजिओप्लास्टी शस्त्रक्रिया केली. त्यांची शस्त्रक्रिया यशस्वी झाली. श्रेयसची तब्येत आता कशी आहे याबद्दलचे अपडेट समोर आले आहे.

श्रेयसला डिस्चार्ज कधी मिळणार?

रुग्णालय प्रशासनाने अभिनेता श्रेयस तळपदेच्या प्रकृतीबाबत अपडेट दिले आहेत. त्यानुसार गुरुवारी (14 डिसेंबर) सायंकाळी श्रेयसला रुग्णालयात दाखल करण्यात आले होते. 10 वाजण्याच्या सुमारास त्यांच्यावर हृदय शस्त्रक्रिया झाली. आता त्यांच्या प्रकृतीत सुधारणा होत आहे. त्यांची प्रकृती स्थिर आहे. त्याला काही दिवसांत डिस्चार्ज दिला जाणार आहे.

हृदयविकाराच्या झटक्यापूर्वी केला होता अॅक्शन सीन

मीडिया रिपोर्ट्सनुसार, अभिनेता मुंबईत वेलकम टू जंगल या चित्रपटाचे शूटिंग करत होता. अक्षय कुमारने चित्रपटाच्या सेटचा एक व्हिडिओ इन्स्टावर शेअर केला आहे. यात श्रेयसही दिसत आहे. व्हिडिओमध्ये अक्षय स्टंट करत आहे. श्रेयस त्यांच्या मागे जिन्यावर उभा आहे. व्हिडिओमध्ये कलाकार मस्ती करताना दिसले. पण पुढच्याच क्षणी श्रेयसच्या बाबतीत असं काही घडेल याची कोणालाच कल्पना नव्हती.

हेही वाचा >> “कटोरा हात मैं लेकर, बाबा के नाम दे”, वडेट्टीवार भुजबळांवर कडाडले

मिळालेल्या माहितीनुसार, शूटिंग संपल्यानंतर श्रेयस बेशुद्ध पडला होता. त्याला तातडीने रुग्णालयात नेण्यात आले. मुंबईतील अंधेरी पश्चिम येथील बेलेव्ह्यू येथे त्यांची अँजिओप्लास्टी करण्यात आली.

हेही वाचा >> अरे हxxxx, तुझ्या xxxxx… राजेश टोपेंना शिवीगाळ, बबनराव लोणीकरांची कथित ऑडिओ क्लिप Viral

सूत्रांनी इंडीओ टुडेला सांगितले की, शूटिंगच्या वेळी अभिनेत्याची प्रकृती ठीक होती. सेटवरही तो मस्ती करत होता. त्‍याने त्‍याच्‍या सीनही त्याने व्यवस्थित केला होता. शूटिंग संपल्यानंतर तो घरी गेला. त्याने आपल्या पत्नी दीप्तीला सांगितले की, त्याला अस्वस्थ वाटत आहे. त्यानंतर अभिनेता श्रेयस बेशुद्ध पडला. दीप्ती त्याला तातडीने रुग्णालयात घेऊन गेली.

कंगनाच्या इमर्जन्सीमध्ये भूमिका

श्रेयस तळपदेच्या आगामी प्रोजेक्टबद्दल सांगायचं झालं तर त्यांचे अनेक चित्रपट तयार होत आहेत. वेलकम टू जंगल व्यतिरिक्त तो कंगना रणौत स्टारर ‘इमर्जन्सी’ चित्रपटातही दिसणार आहे. यामध्ये तो माजी पंतप्रधान अटलबिहारी वाजपेयी यांची भूमिका साकारणार आहे. नुकताच या चित्रपटातील त्याचा लूक समोर आला आहे.

हिंदी चित्रपटांव्यतिरिक्त श्रेयस मराठी चित्रपटांमध्येही काम करतो. अभिनेत्याच्या हिट चित्रपटांमध्ये गोलमाल रिटर्न्स, हाऊसफुल 2, डोर, ओम शांती ओम यांचा समावेश आहे.