मासिक पाळी टाळण्यासाठी गोळ्या घेत असाल तर सावधान, आरोग्यावर 'हे' गंभीर परिणाम होऊ शकतात

मासिक पाळी थांबवणाऱ्या औषधांचे दुष्परिणाम कोणते?

मासिक पाळी थांबवणाऱ्या किंवा पुढे ढकलणाऱ्या औषधांमध्ये साधारणतः प्रोजेस्टेरोन हार्मोन असतो. हाच हार्मोन महिलांच्या शरीरातील मासिक पाळीच्या चक्रावर नियंत्रण ठेवतो.

जेव्हा एखादी महिला ही औषधे घेते, तेव्हा ती शरीरातील नैसर्गिक हार्मोनल सायकल बदलून टाकतात. या औषधांमुळे शरीराला असा संकेत मिळतो की जणू गर्भधारणा झाली आहे, त्यामुळे ओव्ह्युलेशन आणि पीरियड्स काही काळासाठी थांबतात. सामान्यतः डॉक्टर Norethisterone किंवा त्यासारख्या औषधांचा सल्ला देतात, जी पीरियड्स येण्यापूर्वी 3-4दिवसांपासून घ्यावी लागतात.

पूजा किंवा धार्मिक प्रसंगी या औषधांची मागणी का वाढते?

भारतातील अनेक धार्मिक परंपरांनुसार महिलांना मासिक पाळीच्या काळात मंदिरात जाणे किंवा पूजा-अर्चेत सहभागी होणे टाळले जाते. त्यामुळे जेव्हा मोठा सण, लग्न किंवा व्रताचा काळ जवळ येतो, तेव्हा अनेक महिलांना त्या काळात पाळी येऊ नये असे वाटते. त्यामुळे अशा दिवसांमध्ये या गोळ्यांची मागणी वाढते. काही महिला डॉक्टरांचा सल्ला न घेता थेट मेडिकल स्टोअरमधून या गोळ्या विकत घेतात आणि सेवन करतात, जे आरोग्यासाठी धोकादायक ठरू शकते.

या औषधांचे दुष्परिणाम कोणते?

मासिक पाळी थांबवणाऱ्या गोळ्या एखाद-दोन वेळा घेतल्यास मोठा परिणाम दिसून येत नाही, परंतु वारंवार किंवा दीर्घकाळ घेतल्यास शरीरावर गंभीर परिणाम होऊ शकतात.

हार्मोनल असंतुलन : या औषधांमुळे शरीरातील हार्मोन्सचा नैसर्गिक समतोल बिघडतो. त्यामुळे मूड स्विंग्स, चिडचिडेपणा, वजन वाढणे अशा समस्या उद्भवू शकतात.

अनियमित पीरियड्स : सतत या गोळ्यांचा वापर केल्यास मासिक पाळीचे चक्र विस्कळीत होऊ शकते. त्यामुळे पुढच्या महिन्यांमध्ये पाळी उशिरा येणे किंवा अतिप्रमाणात येणे अशी अडचण होऊ शकते.

डोकेदुखी आणि थकवा : या औषधांचा दुष्परिणाम म्हणून डोकेदुखी, थकवा, मळमळ, शरीरात जडपणा किंवा हलका ताप जाणवू शकतो.

रक्ताच्या गाढी (ब्लड क्लॉटिंग) होण्याचा धोका : जागतिक आरोग्य संघटना (WHO) आणि National Health Service (NHS UK) यांच्या मते, हार्मोनल औषधांचा जास्त वापर केल्यास रक्तात थक्के तयार होण्याचा धोका वाढतो, विशेषतः ज्या महिला धूम्रपान करतात किंवा लठ्ठपणाने त्रस्त आहेत त्यांच्यात.

प्रजनन क्षमतेवर परिणाम : या औषधांचा वारंवार वापर केल्यास ओव्ह्युलेशन प्रक्रियेवर परिणाम होऊ शकतो, ज्यामुळे भविष्यात गर्भधारणेच्या अडचणी निर्माण होऊ शकतात.

इतर महत्त्वाच्या बातम्या 

वकील असीम सरोदे यांची सनद 3 महिन्यांसाठी रद्द, बार कौन्सिलचा निर्णय कशामुळे? सरोदे प्रतिक्रिया देताना काय म्हणाले?