Panama Papers Leak: ऐश्वर्या राय बच्चनला ED ने बजावलं समन्स, पण…

मुंबई: पनामा पेपर्स लीक (Panama Papers Leak) प्रकरणी बॉलिवूड अभिनेत्री ऐश्वर्या राय-बच्चनला समन्स बजावण्यात आलं आहे. याच प्रकरणी चौकशीसाठी तिला अंमलबजावणी संचालनालयाने (ED) चौकशीसाठी बोलावले आहे. मात्र, ईडीच्या म्हणण्यानुसार, आज ऐश्वर्या राय बच्चन चौकशीत सहभागी होणार नसल्यामुळे ईडी लवकरच तिला नवीन समन्स बजावणार आहे. याप्रकरणी अलीकडेच ईडीने अभिषेक बच्चनलाही समन्स बजावले होते.

ऐश्वर्या राय बच्चनला याआधी ईडीकडून दोनदा बोलविण्यात आलं होतं. मात्र, दोन्ही वेळा तिने नोटीस पुढे ढकलण्याची विनंती केली होती. पनामा पेपर्स लीकची चौकशी करणाऱ्या विशेष तपास पथकासमोर ही विनंती करण्यात आली होती. मात्र, आता तिला समन्स बजावण्यात आलं आहे.

फेमा प्रकरणी ईडीने ऐश्वर्याला समन्स बजावले होते. हे समन्स 9 नोव्हेंबर रोजी ‘प्रतिक्षा’ म्हणजेच बच्चन कुटुंबीयांच्या निवासस्थानी पाठवण्यात आले होते. त्यावर 15 दिवसांत उत्तर मागितले होते. ज्याला ऐश्वर्याने ईमेलद्वारे उत्तर दिले होता. या संपूर्ण प्रकरणाचा तपास करणाऱ्या SITमध्ये ईडी, आयकर आणि इतर एजन्सींचा समावेश आहे.

काय आहे पनामा पेपर लीक?

पनामा पेपर्स लीक प्रकरणात एका कंपनीची (Mossack Fonseca) कायदेशीर कागदपत्रे लीक झाली होती. हा डेटा जर्मन वृत्तपत्र Süddeutsche Zeitung (SZ) ने Panama Papers या नावाने 3 एप्रिल 2016 रोजी प्रसिद्ध केला होता. त्यात भारतासह 200 देशांमधील राजकारणी, उद्योगपती, सेलिब्रिटींची नावे होती, ज्यांच्यावर मनी लाँड्रिंगचा आरोप होता. यामध्ये 1977 ते 2015 अखेरपर्यंतची माहिती देण्यात आली होती.

या यादीत तब्बल 300 भारतीयांची नावे होती. ज्यामध्ये ऐश्वर्याशिवाय अमिताभ बच्चन, अजय देवगण यांच्या नावाचाही समावेश होता.

हरीश साळवे, विजय मल्ल्या यांचेही नाव

देशाचे माजी सॉलिसिटर जनरल आणि सुप्रीम कोर्टाचे वकील हरीश साळवे, फरारी उद्योगपती विजय मल्ल्या, मोस्ट वॉन्टेड गुन्हेगार इक्बाल मिर्ची यांच्या नावांचाही यात समावेश आहे.

हे प्रकरण सर्वोच्च न्यायालयातही पोहोचले. त्यानंतर केंद्र सरकारने या प्रकरणी मल्टी एजन्सी ग्रुप (MAG) स्थापन केला होता. यामध्ये CBDT, RBI, ED आणि FIU यांचा समावेश होता. पनामा लीक प्रकरणात ज्यांची नावं समोर आली आहे त्या सर्वांची चौकशी करुन काळ्या पैशाच्या तपासासाठी स्थापन केलेल्या SIT ला आणि केंद्र सरकारला अहवाल देत होती.

summons : समन्स म्हणजे काय?; त्यात काय असतं?

पनामा पेपर लीक प्रकरणात कोणाकोणाची नावं?

अलीकडेच लीक झालेल्या पनामा पेपर्समध्ये अनेक नव्या दिग्गज भारतीय उद्योगपतींची नावे समोर आली आहेत. यामध्ये अजय बिजली आणि त्यांचे कुटुंबीय, पीव्हीआर सिनेमाचे मालक, हाइक मेसेंजरचे सीईओ आणि टेलिकॉम क्षेत्रातील दिग्गज सुनील मित्तल यांचा मुलगा केविन मित्तल, एशियन पेंट्सचे सीईओ अश्विन दाणी यांचा मुलगा जलज दाणी यांच्याही नावाचा समावेश आहे.