Russia-Ukraine War : युद्धाची किंमत मोजावी लागेल; बायडन यांचा पुतिन यांना इशारा

अमेरिकेचे अध्यक्ष जो बायडन यांनी आज अमेरिकन संसदेला संबोधित केलं. यावेळी बोलताना त्यांनी रशियाचे राष्ट्राध्यक्ष व्लादिमीर पुतिन यांच्या युद्धाच्या निर्णयावर जोरदार टीकास्त्र डागलं. अप्रत्यक्षपणे पुतिन यांचा उल्लेख हुकुमशाह असा करत जोपर्यंत किंमत चुकवावी लागणार नाही, तोपर्यंत अराजक निर्माण करत राहतील, असं बायडन म्हणाले.

अमेरिकन संसदेला संबोधित करताना अध्यक्ष बायडन यांनी सुरुवातीलाच रशियाने युक्रेनवर केलेल्या आक्रमणाबद्दल भूमिका मांडली. युक्रेनवर लादलेल्या युद्धाबद्दल बायडन यांनी रशियाचे राष्ट्राध्यक्ष व्लादिमीर पुतिन यांच्यावर टीका केली. तर युक्रेनच्या नागरिकांच्या लढाऊ बाण्याचं कौतूक करत युक्रेनच्या पाठिशी ठामपणे उभं असल्याचं आश्वासन दिलं.

अध्यक्ष बायडन म्हणाले,”पुतिन यांनी युद्ध रोखण्यासाठी प्रयत्न करायला हवे होते, मात्र त्यांनी तसं केलं नाही. पुतिन यांना वाटत होतं की पश्चिमेकडील देश आणि नाटो प्रत्युत्तर देणार नाही. आमच्यामध्ये फूट पडेल, असं त्यांना वाटतं होतं, पण पुतिन चुकले. आम्ही तयार आहोत.”

संसदेला संबोधित करताना बायडन म्हणाले, “जेव्हा इतिहास लिहिला जाईल, तेव्हा पुतिन यांच्याकडून युक्रेनविरुद्ध पुकारण्यात आलेल्या युद्धामुळे रशिया कुमकुवत होईल आणि जगातील इतर देशांना शक्तिशाली बनवेल. इतिहासातून आपण हेच शिकलो आहोत की, जोपर्यंत हुकुमशाहाला त्याच्या आक्रमणाची किंमत चुकावी लागत नाही, तोपर्यंत तो जास्त अराजकता निर्माण करतो.”

“सहा दिवसांपूर्वी पुतिन यांनी स्वतंत्र जगाच्या मूळ पायालाच हादरा देण्याचा प्रयत्न केला. त्यांना वाटलं, त्यांच्या घातक योजनांनी ते जगाला झुकवतील; पण त्यांनी चुकीचा अंदाज लावला. पुतिन यांनी कधी कल्पनाही केली नसेल, अशा शक्तिशाली भिंतीशी त्यांचा सामना झालाय. त्यांचा सामना युक्रेनियन लोकांशी झालाय. आम्ही युक्रेनच्या नागरिकांच्या पाठिशी आहोत.”

“अमेरिकी सैना युक्रेनमध्ये रशियन सैन्याविरोधात उतरणार नाही, पण आम्ही रशियाला मनमानीही करू देणार नाही. अमेरिका रशियावर आर्थिक निर्बंध लादत आहे. अमेरिकेनं रशियाच्या खोट्याचा सामना सत्याने केला आहे आणि युक्रेन सैन्याला आर्थिक मदत आणि इतर सहाय्य केलं जात आहे.”

“रशियाच्या सर्व प्रकारच्या विमानांसाठी अमेरिका हवाई हद्द बंद करत आहे. यासारखी पावलं आधीच युरोपीय राष्ट्र, कॅनडा यांनीही उचलली आहेत. हे निर्बंध रशियाला वेगळं पाडतील आणि रशियाच्या अर्थव्यवस्थेवरही प्रचंड दबाव येईल>”