उद्धव ठाकरेंचा राजीनामा की एकनाथ शिंदेंचं बंड? काय असेल राज ठाकरेंचं नवं कार्टून?

आपलं सरकार अल्पमतात आलंय हे लक्षात आल्यावर उद्धव ठाकरे यांनी २९ जूनला राजीनामा दिला. त्यानंतर ३० जूनला एकनाथ शिंदे हे भाजपच्या पाठिंब्यावर मुख्यमंत्री झाले तर देवेंद्र फडणवीस उपमुख्यमंत्री झाले.

राज ठाकरेंचं नवं कार्टून नेमकं असणार तरी काय?

या सगळ्या घडामोडींच्या दरम्यान राज ठाकरे यांनी काहीही भाष्य केलं नव्हतं. त्यांनी दोन्ही नेत्यांचं पत्र पाठवून अभिनंदन केलं. आता राज ठाकरे नवं व्यंगचित्र काढत आहेत. त्यामुळे महाराष्ट्रात घडलेल्या सत्तानाट्यावर त्यांचं व्यंगचित्र येणार का? उद्धव ठाकरेंचा राजीनामा, एकनाथ शिंदेंचं बंड, देवेंद्र फडणवीस यांचं उपमुख्यमंत्रीपद असं त्या व्यंगचित्रात असेल? हे सध्या तरी राज ठाकरेंनाच ठाऊक आहे. तसंच हे एक व्यंगचित्र असेल की त्यापेक्षा जास्त? या प्रश्नाचं उत्तरही राज ठाकरेंनाच ठाऊक आहे. राज ठाकरे हे सध्या नवं कार्टून काढत आहेत.

मनसे अध्यक्ष राज ठाकरे यांच्यावर बाळासाहेब ठाकरे यांच्या व्यंगचित्राच्या शैलीचा प्रभाव आहे. व्यंगचित्रकारीतेचे धडे त्यांनी बाळासाहेब ठाकरेंच्या तालमीतच घेतले. तसंच डेव्हिड लो या विख्यात व्यंगचित्रकाराच्या शैलीचाही प्रभाव त्यांच्यावर आहे. आत्तापर्यंत राज ठाकरे यांनी काढलेली अनेक व्यंगचित्रं चर्चेचा आणि बातमीचा विषय ठरली आहेत. नुकतीच राज ठाकरेंवर हिपबोनची शस्त्रक्रिया झाली. त्यानंतर ते सध्या घरी आराम करत आहेत. नुकतीच देवेंद्र फडणवीस यांनी राज ठाकरेंची भेट घेतली होती. त्याची चर्चा चांगलीच झाली. आजच गायिका आशा भोसले यांनी राज ठाकरेंची भेट घेतली आणि प्रकृतीची विचारपूस केली.

दरम्यान राज ठाकरे हे व्यंगचित्र काढत असतानाचे फोटो सोशल मीडियावर व्हायरल झाले आहेत. या फोटोत राज ठाकरे हे आपल्या व्यंगचित्रकलेत दंग होऊन गेल्याचं दिसतं आहे. त्यांचं नवं व्यंगचित्र लवकरच येणार आहे. त्या व्यंगचित्रात नेमकं कशावर भाष्य असेल याचीच चर्चाही होते आहे. राज ठाकरे व्यंगचित्र काढतात त्याची बातमी होते हे महाराष्ट्राला माहित आहेच.

राज ठाकरे यांनी मशिदींवरच्या भोंग्याविरोधात भूमिका घेत आधी गुढीपाडव्याला आणि त्यानंतर इतर शहरांत त्यांनी सभा घेतल्या. या सभांच्या नंतर राजकारणात त्याचे पडसद राज्यभरात उमटले होते. आता त्यानी खास फोटो पोस्ट केले आहेत. ज्या फोटोंमध्ये राज ठाकरे व्यंगचित्र काढत आहेत हे दिसतं आहे.