अमित ठाकरे यांच्या विरोधात दाखल झालेल्या FIR मध्ये काय?

हेही वाचा : छत्रपती शिवाजी महाराजांच्या बाजूला पंतप्रधानांचा फोटो, अमित ठाकरेंनी काय केलं?

विनापरवाना आणि बेकायदेशीररीत्या जमले, FIR मध्ये काय काय?

या घटनेनंतर अमित ठाकरे आणि त्यांच्यासोबत असलेल्या पदाधिकारी, विद्यार्थी आणि कार्यकर्त्यांविरोधात गुन्हा दाखल करण्यात आला. महाविद्यालयाशी संबंधित एका व्यक्तीने दिलेल्या तक्रारीनुसार, दुपारी साडेबारा ते सव्वाच्या दरम्यान अमित  ठाकरे आणि त्यांच्यासोबत 25 ते 25 पदाधिकारी, विद्यार्थी व कार्यकर्ते विनापरवाना आणि बेकायदेशीररीत्या जमले. त्यानंतर त्यांनी कॉलेजच्या कार्यालयात विनापरवाना प्रवेश केला. कार्यालयात असलेला पंतप्रधान नरेंद्र मोदी यांचा फोटो काढून घेतला, तसेच तक्रारदार आणि त्यांच्या सहकाऱ्यांना धमकावल्याचा आरोप तक्रारीत करण्यात आला आहे. कार्यालयात विनाकारण थांबून जोरजोरात घोषणा देत गोंधळ घातल्याचेही तक्रारीत नमूद करण्यात आले आहे. या प्रकरणी अमित ठाकरे आणि त्यांच्यासोबत आलेल्या 20 ते 25 अनोळखी पदाधिकारी, विद्यार्थी व कार्यकर्त्यांविरोधात कायदेशीर तक्रार दाखल करण्यात आली.

हेही वाचा : Maharashtra Weather : राज्यात पावसाचा वेग मंदावला, नवं संकट समोर

नरेंद्र मोदींचा फोटो पुन्हा कार्यालयात लावला

या प्रकरणात भारतीय न्याय संहितेतील कलम 189(1), 329, 351(2) यांसह संबंधित कलमांचा उल्लेख करण्यात आला आहे. कलम 189(1) हे बेकायदेशीर जमावाशी संबंधित असल्याचे सांगण्यात आले आहे. तसेच 329 अंतर्गत गुन्हा करण्याच्या उद्देशाने बेकायदेशीररीत्या शासकीय इमारतीत किंवा ठिकाणी प्रवेश केल्याचा मुद्दा मांडण्यात आला आहे. कलम 351 (2) अंतर्गत धमकी देण्याशी संबंधित आरोप करण्यात आला आहे. या घटनेनंतर भाजपकडूनही प्रतिक्रिया देण्यात आली. भाजप नेते प्रवीण दरेकर यांनी अमित ठाकरे यांच्या कृतीवर प्रतिक्रिया देत प्रोटोकॉलचा मुद्दा उपस्थित केला. भाजपकडून संबंधित फोटो पुन्हा त्याच ठिकाणी लावण्यात आला आणि कॉलेज प्रशासनानेही नरेंद्र मोदींचा फोटो पुन्हा कार्यालयात लावला.

या प्रकरणावर प्रतिक्रिया देताना अमित ठाकरे यांनी आपल्यावर दाखल झालेला हा दुसरा गुन्हा असल्याचे सांगितले. आपल्यावर पहिला गुन्हाही छत्रपती शिवाजी महाराजांसाठी दाखल झाला होता आणि आता दुसरा गुन्हाही छत्रपती शिवाजी महाराजांच्या संदर्भातील प्रकरणात दाखल झाल्याचे त्यांनी म्हटले. या प्रकरणामुळे अमित ठाकरे यांच्या पुणे दौऱ्यादरम्यान घडलेल्या घटनेची चर्चा झाली आहे. विद्यार्थ्यांच्या समस्या जाणून घेण्यासाठी सुरू असलेल्या दौऱ्यात शासकीय तंत्रनिकेतनमधील कॅन्टीनपासून सुरू झालेला विषय कार्यालयातील फोटो काढण्यापर्यंत पोहोचला आणि त्यानंतर अमित ठाकरे यांच्याविरोधात FIR दाखल झाली. दरम्यान, भाजपकडून फोटो आणि प्रोटोकॉलचा मुद्दा मांडण्यात आला, तर अमित ठाकरे यांनी छत्रपती शिवाजी महाराजांच्या संदर्भातील भूमिकेवर भर दिला.