सोनम वांगचुक यांच्या आंदोलनाला मनसेचा पाठिंबा; भाजपवर राज ठाकरेंची सडकून टीका

राज ठाकरे यांनी म्हटले की, सोनम वांगचुक यांच्या उपोषणाचा आज 19 वा दिवस असून त्यांच्या प्रकृतीबाबत समोर येणाऱ्या बातम्या आणि सोशल मीडियावरील दृश्ये चिंताजनक आहेत. आंदोलन ही लोकशाहीतील महत्त्वाची जागा असून सरकारने तिचा आदर केला पाहिजे. मात्र, सरकार आंदोलन दडपण्याचा प्रयत्न करत असल्याचा आरोप त्यांनी केला.

'आंदोलनांकडे सरकारचे दुर्लक्ष'

राज ठाकरे यांनी आपल्या पोस्टमध्ये म्हटले की, सरकारकडे सत्तेची अमर्याद ताकद असल्यामुळे आंदोलनांकडे गांभीर्याने पाहिले जात नाही. लोकशाहीतील निष्पक्ष संस्थांवर नियंत्रण मिळवल्याचा आरोप करत त्यांनी निवडणुका, माध्यमांची भूमिका आणि सत्तेच्या वापराबाबतही प्रश्न उपस्थित केले.

हे ही वाचा>>

त्यांच्या मते, समाजातील महत्त्वाच्या प्रश्नांवर बोलणाऱ्या माध्यमांवर दबाव असल्याने आंदोलनांना योग्य ती दखल मिळत नाही. त्यामुळे एखाद्या चांगल्या उद्देशाने सुरू झालेल्या आंदोलनालाही सहजपणे चिरडले जात असल्याची टीकाही त्यांनी केली.

सोनम वांगचुक यांच्या मागण्यांना मनसेचा पाठिंबा

राज ठाकरे यांनी स्पष्ट केले की, सोनम वांगचुक यांच्या मागण्या चुकीच्या नाहीत. त्यांनी परीक्षा व्यवस्थेत संपूर्ण पारदर्शकता आणण्याची आणि संबंधित जबाबदार मंत्र्यांवर कारवाई करण्याची मागणी योग्य असल्याचे म्हटले.

हे ही वाचा>>

मनसेने यापूर्वीही NEET परीक्षेतील कथित गैरव्यवहाराच्या वेळी याच स्वरूपाच्या मागण्या केल्या होत्या, असेही त्यांनी नमूद केले.

NEET प्रकरणावर सरकारवर निशाणा

राज ठाकरे यांनी NEET परीक्षेतील कथित गोंधळाचा उल्लेख करत लाखो विद्यार्थी आणि त्यांच्या पालकांना त्याचा फटका बसल्याचे म्हटले. हा केवळ राजकीय नव्हे तर सामाजिक प्रश्न असल्याचे त्यांनी अधोरेखित केले.

त्यांनी म्हटले की, परीक्षांमधील कथित गैरव्यवहार, पेपरफुटी आणि पारदर्शकतेचा अभाव यामुळे विद्यार्थ्यांचे भविष्य धोक्यात आले आहे. अशा विषयांवर सरकारने ठोस भूमिका घेणे आवश्यक असल्याचे त्यांनी सांगितले.

पंतप्रधान नरेंद्र मोदींना आवाहन

राज ठाकरे यांनी पंतप्रधान नरेंद्र मोदी यांना या विषयात स्वतः लक्ष घालण्याचे आवाहन केले. पंतप्रधान म्हणून कार्यकाळ किती मोठा आहे यापेक्षा, विद्यार्थ्यांच्या भविष्यासारख्या गंभीर प्रश्नांवर घेतलेले निर्णय अधिक महत्त्वाचे ठरतील, असे त्यांनी आपल्या पोस्टमध्ये म्हटले.

'लोकांनी स्क्रीनच्या बाहेर यायला हवं'

राज ठाकरे यांनी समाजालाही आवाहन केले. सोशल मीडियावरील प्रतिक्रिया आणि पोस्टपुरते मर्यादित न राहता नागरिकांनी प्रत्यक्ष लोकशाही प्रक्रियेत सहभागी व्हावे, प्रश्न विचारावेत आणि आंदोलनांमध्ये सहभाग घ्यावा, असे त्यांनी म्हटले.

महाराष्ट्रात हिंदी सक्तीच्या विरोधातील आंदोलनाचा उल्लेख करत त्यांनी संघटित लोकमतामुळे सरकारला माघार घ्यावी लागली होती, असे उदाहरण दिले.

'मनसे आंदोलनाच्या पाठीशी'

पोस्टच्या शेवटी राज ठाकरे यांनी स्पष्ट केले की, कोणत्याही पारदर्शक व्यवस्थेसाठी उभ्या राहणाऱ्या आंदोलनाच्या पाठीशी महाराष्ट्र नवनिर्माण सेना ठामपणे उभी राहील. केवळ NEET नव्हे, तर सर्व स्पर्धा परीक्षांमध्ये पारदर्शकता यावी आणि दोषींवर कारवाई व्हावी, अशी भूमिका त्यांनी पुन्हा एकदा मांडली.