तुफान व्हायरल इरफान जेव्हा राजदीप सरदेसाईंना भेटला... जबरदस्त मुलाखत

देशातील 90 टक्के असंघटित कामगारांना सामाजिक सुरक्षा आणि सन्मानजनक वेतन मिळत नसल्याची खंत व्यक्त करत, प्रत्येक कामगाराला किमान उत्पन्नाची हमी मिळणे आवश्यक असल्याचे त्यांनी नमूद केले. सरकारने याबाबत ठोस धोरण आखून त्याची प्रभावी अंमलबजावणी करावी, अशी अपेक्षाही त्यांनी व्यक्त केली.

हेही वाचा : पार्थ पवार आणि कायनात दारा यांचा साखरपुडा संपन्न, पुण्यातील समारंभाला दिग्गजांची उपस्थिती

'अन्यायाविरोधात निर्भयपणे प्रश्न विचारू शकला पाहिजे'

मुलाखतीत इरफान यांनी जंतरमंतर आंदोलनातील अनुभव आणि लोकशाहीबाबतची आपली भूमिका सविस्तर मांडली. त्यांच्या मते, लोकशाही म्हणजे शेवटच्या टप्प्यावर उभा असलेला नागरिक अन्यायाविरोधात निर्भयपणे प्रश्न विचारू शकला पाहिजे. मतभेद असणे हे लोकशाहीचे वैशिष्ट्य असून, असहमती व्यक्त करणाऱ्यांना देशविरोधी ठरवू नये, असे ते म्हणाले. संवादातून मतभेद दूर करण्याची गरज त्यांनी अधोरेखित केली. नीट परीक्षेतील पेपर लीकच्या मुद्द्यावर बोलताना त्यांनी विद्यार्थ्यांच्या स्वप्नांशी खेळ होऊ नये, असे सांगितले. गरीब आणि मध्यमवर्गीय कुटुंबांतील विद्यार्थ्यांसाठी नीट ही केवळ परीक्षा नसून डॉक्टर होण्याच्या स्वप्नाचा मार्ग असल्याचे त्यांनी नमूद केले. पेपर लीकमुळे विद्यार्थ्यांच्या मेहनतीवर पाणी फिरत असल्याची खंत त्यांनी व्यक्त केली. आंदोलनादरम्यान काही विद्यार्थ्यांनी सोशल मीडियावर व्यक्त केलेल्या आक्षेपार्ह भाषेचे समर्थन आपण करत नसल्याचेही त्यांनी स्पष्ट केले.

हेही वाचा : लेक 40 दिवसांनी आला, मिठी मारत रडले, धमक्या, भीती सांगितली, अभिजीतलाही रडू आलं

'देशातील मोठा वर्ग अजूनही मूलभूत सुविधांपासून वंचित'

शिक्षण, संविधान आणि सामाजिक समानता यावरही इरफान यांनी आपले विचार मांडले. आपण औपचारिक शिक्षण घेतले नसले, तरी संविधानातील समानता, शिक्षण, आरोग्य आणि मूलभूत सुविधांबाबतच्या संकल्पनांवर विश्वास असल्याचे त्यांनी सांगितले. देशातील मोठा वर्ग अजूनही मूलभूत सुविधांपासून वंचित असल्यामुळे नागरिकांनी सरकारला प्रश्न विचारलेच पाहिजेत, असे ते म्हणाले. एनसीआरबीच्या आकडेवारीचा उल्लेख करत त्यांनी कामगार, महिला आणि समाजातील वंचित घटकांशी संबंधित प्रश्न उपस्थित केले. प्रत्येक सरकारने जनतेच्या प्रश्नांना उत्तर देण्याची जबाबदारी स्वीकारली पाहिजे, असेही त्यांनी नमूद केले. आपल्या मते, शिक्षण हेच समाज बदलण्याचे सर्वात प्रभावी साधन असून प्रत्येक पालकाने आपल्या मुलांना शिक्षण द्यावे, हा संदेश त्यांनी देशवासीयांना दिला.

राजदीप सरदेसाई यांनी नरेंद्र मोदी किंवा अमित शाह यांची भेट झाली तर काय सांगाल, असा प्रश्न विचारला असता, इरफान यांनी राष्ट्रहिताच्या मुद्द्यांवर कोणालाही भेटण्यास आपण तयार असल्याचे सांगितले. मात्र, सर्वप्रथम पोलिस यंत्रणा, अमली पदार्थांचा प्रश्न आणि भ्रष्टाचार याकडे लक्ष वेधू इच्छित असल्याचे त्यांनी स्पष्ट केले. आदर्श भारताची संकल्पना मांडताना प्रत्येक नागरिकाला सन्मानाने आरोग्यसेवा, शिक्षण आणि जगण्याच्या मूलभूत सुविधा उपलब्ध व्हाव्यात, अशी अपेक्षा त्यांनी व्यक्त केली. जंतरमंतर आंदोलनात सहभागी होण्यामागे सरकारविरोधातील प्रत्येक लोकशाही आवाजाच्या पाठीशी उभे राहण्याची भूमिका असल्याचेही त्यांनी सांगितले. मुलाखतीच्या शेवटी त्यांनी आयुष्यात चांगले काम करण्याचा संदेश देत, कफनात गेल्यानंतर कोणतीही संधी उरत नाही, त्यामुळे आयुष्यात शक्य तितके चांगले कार्य करावे, असे आवाहन केले.