अजित पवारांच्या राष्ट्रवादीकडून नवाब मलिक यांच्या कुटुंबातील 3 जण निवडणुकीच्या रिंगणात

नवाब मलिक यांचे भाऊ कप्तान मलिक, बहीण डॉ. सईदा खान आणि कप्तान मलिक यांची सून बुशरा नदीम मलिक हे तिघे यंदाच्या महापालिका निवडणुकीत उमेदवारीसाठी सज्ज आहेत. कप्तान मलिक प्रभाग क्रमांक 165 मधून निवडणूक लढवणार आहेत. नवाब मलिक यांची बहीण डॉ. सईदा खान या प्रभाग क्रमांक 168 मधून निवडणुकीच्या मैदानात उतरणार आहेत, तर कप्तान मलिक यांची सून बुशरा नदीम मलिक प्रभाग क्रमांक 170 मधून निवडणूक लढवणार असल्याचे स्पष्ट झाले आहे.

विशेष म्हणजे, यापूर्वी कप्तान मलिक यांचा असलेला प्रभाग क्रमांक 168 हा यंदा महिलांसाठी राखीव झाल्याने रणनीतीत बदल करण्यात आला आहे. या पार्श्वभूमीवर कप्तान मलिक यांनी स्वतःच्या प्रभागातून सुनेला संधी देण्याचा निर्णय घेतला असून, स्वतःसाठी नवीन प्रभाग क्रमांक 165 निवडला आहे. त्यामुळे मलिक कुटुंबाकडून उमेदवारी ठरवताना प्रभाग रचना आणि आरक्षणाचा बारकाईने विचार करण्यात आल्याचे चित्र आहे.

हेही वाचा : मुंबईची खबर: मुंबईकरांनो! नवीन वर्षाच्या स्वागतासाठी मध्य आणि पश्चिम रेल्वेवर 12 स्पेशल लोकल धावणार...

2017 च्या महापालिका निवडणुकीत नवाब मलिक यांचे बंधू कप्तान मलिक आणि बहीण डॉ. सईदा खान हे दोघेही विजयी झाले होते. त्यामुळे यंदाही मलिक कुटुंबाकडे अनुभव आणि स्थानिक पातळीवर मजबूत पकड असल्याचे मानले जात आहे. या पार्श्वभूमीवर तिसऱ्या उमेदवाराच्या रूपाने बुशरा नदीम मलिक यांच्या प्रवेशामुळे राजकीय चर्चा रंगू लागल्या आहेत.

दरम्यान, महापालिका निवडणूक राष्ट्रवादी काँग्रेस (अजित पवार गट) स्वबळावर लढवण्याच्या तयारीत असल्याचे संकेत पक्षाच्या स्टार प्रचारक आणि आमदार सना मलिक यांनी दिले आहेत. गेल्या दोन महिन्यांपासून पक्षाकडून इच्छुक उमेदवारांशी चर्चा सुरू असून, प्रत्येक प्रभागातील पक्षाची ताकद आणि राजकीय गणितांचा आढावा घेण्यात आला आहे. महायुतीसोबत निवडणूक लढवणे हे आमचे प्राधान्य असले, तरी परिस्थिती पाहता स्वबळावर लढण्यासाठीही आम्ही पूर्णपणे सज्ज आहोत, असे सना मलिक यांनी स्पष्ट केले आहे.

या पार्श्वभूमीवर मलिक कुटुंबातील तीन उमेदवार रिंगणात उतरल्यास, मुंबईतील संबंधित प्रभागांमध्ये राष्ट्रवादीची ताकद वाढण्याची शक्यता आहे. त्यामुळे आगामी महापालिका निवडणूक मलिक कुटुंबासाठी तसेच अजित पवार गटाच्या राष्ट्रवादीसाठीही महत्त्वाची ठरणार आहे.

इतर महत्त्वाच्या बातम्या 

दोन्ही मुली सहा वर्षांपासून एकाच घरात... कधीच बाहेर पडल्या नाहीत अन् अचानक मृत्यू! 'त्या' घरात नेमकं काय सुरू होतं?