नेकी का काम, आंदेकरका नाम! गुंड बंडू आंदेकरची घोषणाबाजी, तोंडावर फडकं बांधून भरला उमेदवारी अर्ज

“नेकी का काम आंदेकरका नाम”, “आंदेकरांना मत म्हणजे विकास कामाला मत”, “मी उमेदवार आहे, दरोडेखोर नाही” अशा घोषणा देत बंडू आंदेकरने स्वतःची प्रतिमा वेगळी दाखवण्याचा प्रयत्न केला. विशेष म्हणजे, न्यायालयाच्या स्पष्ट आदेशांनुसार कोणतीही मिरवणूक, भाषण किंवा घोषणाबाजी करण्यास मनाई असतानाही, घोषणांचे हे दृश्य अनेकांच्या भुवया उंचावणारे ठरले. अर्ज दाखल करताना बंडू आंदेकरसह लक्ष्मी आंदेकर आणि सोनाली आंदेकर यांनी तोंडावर स्कार्फ किंवा फडकं बांधले होते.

हेही वाचा : नवी मुंबई हादरली! हिंदीत बोलत होती, म्हणून 6 वर्षांच्या लेकीलाच संपवलं... मुलगी झाल्याच्या तणावात आईचं निर्दयी कृत्य

पुण्यातील भवानी पेठ येथील विभागीय कार्यालयात अर्ज दाखल करण्यासाठी आंदेकर टोळीचे सदस्य कडक पोलिस बंदोबस्तात आणण्यात आले. लक्ष्मी आंदेकर आणि सोनाली आंदेकर या दोघींना प्रथम उमेदवारी अर्ज दाखल करण्यासाठी आणण्यात आले. या दोघी कोल्हापूर येथील कळंबा मध्यवर्ती कारागृहात बंदिस्त होत्या. न्यायालयाने काही अटी व शर्तींसह त्यांना निवडणूक प्रक्रियेसाठी परवानगी दिल्यानंतर, पोलिसांच्या गराड्यात त्यांना पुण्यात आणण्यात आले.

आंदेकर टोळीचा म्होरक्या बंडू आंदेकर सध्या तुरुंगात असून, न्यायालयाने त्यालाही अर्ज दाखल करण्यापुरती मर्यादित परवानगी दिली आहे. सूत्रांच्या माहितीनुसार, बंडू आंदेकर प्रभाग क्रमांक 22 मधून, तर लक्ष्मी आणि सोनाली आंदेकर या प्रभाग क्रमांक 23 मधून निवडणूक लढवण्याची शक्यता आहे. अर्ज दाखल प्रक्रियेच्या वेळी कोणताही अनुचित प्रकार घडू नये यासाठी पोलिसांनी मोठ्या प्रमाणावर बंदोबस्त तैनात केला होता.

दरम्यान, आंदेकर टोळीच्या उमेदवारीला तीव्र विरोधही व्यक्त केला जात आहे. गँगवॉरमध्ये मृत्यूमुखी पडलेल्या आयुष कोमकरच्या आईने आंदेकर टोळीतील सदस्यांना उमेदवारी देऊ नये, अशी विनंती सर्वपक्षीय नेत्यांकडे केली आहे. “माझ्या मुलाला न्याय मिळावा” अशी भावनिक मागणी करत त्यांनी सोशल मीडियावर व्हिडिओ पोस्ट करत आपली भूमिका मांडली होती. या पार्श्वभूमीवर, गुन्हेगारी पार्श्वभूमी असलेल्या व्यक्तींच्या राजकारणातील प्रवेशावर पुन्हा एकदा गंभीर चर्चा सुरू झाली आहे.

इतर महत्त्वाच्या बातम्या 

मुंबई महापालिका : संजय राऊतांचे भाऊ निवडणूक लढण्यास इच्छुक, पण तोच विक्रोळीतील वार्ड राष्ट्रवादीला हवा