निलेश घायवळला कानशि‍लात लगावणाऱ्या गुंडावर गोळीबार, आता रोहित पवारांची मुख्यमंत्र्यांना टॅग करत पोस्ट

सागर मोहळकर हा जामखेड परिसरातील एक कुख्यात गुंड असून त्याच्यावर 307 (जीवे मारण्याचा प्रयत्न) सारखे अनेक गंभीर गुन्हे दाखल आहेत. तो काही दिवसांपूर्वीच नाशिक मध्यवर्ती कारागृहातून जामिनावर बाहेर आला होता. तो नशेच्या आहारी गेला असल्याने परिसरात त्याची मोठी दहशत होती. विशेष म्हणजे, दोन दिवसांपूर्वीच त्याच्या वडिलांनी त्याच्या विरोधात जामखेड पोलीस ठाण्यात एनसी (NC) दाखल केली होती. कारागृहातून बाहेर आल्यानंतर काही दिवसांतच त्याच्यावर असा जीवघेणा हल्ला झाल्याने यामागे जुना वाद किंवा टोळीयुद्ध असण्याची शक्यता वर्तवण्यात येत आहे.

हेही वाचा : मुंबई-अहमदाबाद हायवेवर बर्निंग ट्रकचा थरार, ड्रायव्हरचा केबिनमध्येच होरपळून मृत्यू; व्हिडिओ

या घटनेनंतर कर्जत-जामखेडचे आमदार रोहित पवार यांनी सोशल मीडियावर पोस्ट करत राज्य सरकार आणि पोलीस प्रशासनावर तीव्र शब्दांत ताशेरे ओढले आहेत. रोहित पवार यांनी आपल्या पोस्टमध्ये म्हटले आहे की, "माझ्या मतदारसंघात जामखेडमध्ये गेल्या काही काळापासून गुन्हेगारी वेगाने फोफावत असून गुन्हेगारांकडून गोळीबाराच्या अनेक घटना घडल्या आहेत. त्यामुळं सामान्य माणसांमध्ये दहशतीचं वातावरण असून यासंदर्भात अनेकदा आवाज उठवला तरी या घटनांना आळा घालण्यास पोलीस प्रशासनाला यश आलेलं नाही. आजही सागर मोहोळकर या तरुणावर गोळ्या झाडण्यात आल्या असून तो गंभीर जखमी आहे. पोलीस प्रशासनाने हे गुन्हेगार आणि त्यांच्या टोळ्यांच्या मुसक्या आवळून त्यांचा समूळ नायनाट करावा आणि सामान्य माणसासाठी दहशतमुक्त वातावरण निर्माण करावं. तसंच सरकारनेही या गोष्टीकडं गांभीर्याने लक्ष द्यावं, ही विनंती!"

गोळीबाराच्या या घटनेमुळे जामखेड शहरात भीतीचे वातावरण पसरले असून रुग्णालयाबाहेर नागरिकांनी मोठी गर्दी केली होती. भरवस्तीत आणि वर्दळीच्या वेळी झालेल्या या गोळीबारामुळे कायदा व सुव्यवस्थेचा प्रश्न पुन्हा एकदा ऐरणीवर आला आहे. जामखेड पोलीस या प्रकरणाचा अधिक तपास करत असून लवकरच आरोपींना अटक करण्यात येईल, असा विश्वास प्रशासनाकडून व्यक्त केला जात आहे.

इतर महत्त्वाच्या बातम्या 

निलेश घायवळला कानशि‍लात लगावणाऱ्या कुख्यात गुंडावर गोळीबार, सागर मोहळकरवर सात राऊंड फायर