BMC Election: रात्री प्रचंड मोठ्या घडामोडी, शेवटच्या क्षणी शिवसेना-भाजपने केली 'ती' घोषणा!

'मुंबईवर हिंदुत्वाचा महापौर निवडून येईल'

"भाजप-शिवसेना-रिपाईची महायुती मुंबई महापालिकेच्या २२७ जागा लढणार आहे. यात भाजपला १३७ जागा आणि शिवसेनेला ९० जागा असे वाटप झाले आहे. महायुतीचे इतर घटक पक्ष या आकड्यातच समाविष्ट केले जातील. येणाऱ्या काळात एकत्रित प्रचाराचा शुभारंभ होईल. मुंबई महानगरपालिकेवर हिंदुत्वाचा आणि महायुतीचा भगवा झेंडा फडकवण्यासाठी मुंबईकरांचा महापौर निवडून आणला पाहिजे. मुंबईच्या विकासाबरोबरच शहराची सुरक्षितता अबाधित राहील आणि शहराचा रंग बदलण्याचा प्रयत्न करणाऱ्या शक्तींचा पराभव होईल."

हे ही वाचा>> अखेर किशोरी पेडणेकरांना उमेदवारी जाहीर, हातातील एबी फॉर्म दाखवत मातोश्रीबाहेर येऊन दिली पहिली प्रतिक्रिया

साटम यांनी विरोधकांवर टीका करताना म्हटले, "आता एक नवीन 'मामूंची टोळी' शहराचा ताबा घेऊ इच्छिते. त्यांना घरी पाठवण्याचे काम महायुती करेल. उमेदवारी अर्ज दाखल करण्याचा उद्या शेवटचा दिवस आहे. आज रात्रीपर्यंत सर्व उमेदवारांना सूचित केले जाईल. याआधी २०० पेक्षा अधिक जागांवर एकमत झाले होते, फक्त २० जागांची चर्चा बाकी होती. त्यामुळे काही उमेदवारांनी आज अर्ज दाखल केले आहेत. उर्वरित महायुतीचे उमेदवार उद्या अर्ज दाखल करतील."

बंडखोरीच्या प्रश्नावर साटम म्हणाले, "बंडखोरी दिसते, पण ती मुंबईचा रंग बदलू इच्छिणाऱ्यांच्या पक्षातून येते. उबाठा आणि मनसेतील इच्छुक कार्यकर्ते बंडखोरी करताना दिसत आहेत. आमच्याकडे कोणाचीही नाराजी नाही. सर्वांना सामावून घेऊन एकमताने निर्णय घेतला आहे."

'मराठी महापौर मुंबईत बसवू...'

दुसरीकडे, शिवसेना (शिंदे गट) नेते आणि खासदार राहुल शेवाळे यांनीही जागावाटपावर समाधान व्यक्त केले. ते म्हणाले, "एक चांगला फॉर्म्युला ठरला आहे. महायुतीचे १५० पेक्षा अधिक उमेदवार निवडून येतील. महायुतीचाच आणि मराठी महापौर मुंबईत बसवू. २२७ जागांवर उद्या सर्व उमेदवार अर्ज दाखल करतील. मुंबईकर विकासाच्या मुद्द्यावर मतदान करतील. केंद्र आणि राज्यात महायुतीची सत्ता असल्याने मुंबईकर महायुतीलाच महापौर निवडून देतील."

हे ही वाचा>> मुंबई महापालिका : भाजपची 66 उमेदवारांची पहिली यादी, AB फॉर्मही दिले; पाहा सर्वांची नावं एका क्लिकवर

मुंबई महापालिका निवडणुकीसाठी उमेदवारी अर्ज दाखल करण्याची प्रक्रिया सुरू असून, ३० डिसेंबर हा शेवटचा दिवस आहे. महायुतीच्या या जागावाटपामुळे आता प्रचाराला वेग येणार असून, हिंदुत्व, विकास आणि सुरक्षितता हे प्रमुख मुद्दे ठरणार आहेत. विरोधी आघाड्यांमध्येही जागावाटपाच्या चर्चा अंतिम टप्प्यात आहेत, मात्र महायुतीने वेळीच निर्णय घेऊन आघाडी घेतली आहे.