बिल्डरच्या कार्यालयाची तोडफोड करणाऱ्या वंचितच्या कार्यकर्त्यांची न्यायालयाकडून सुटका, शिंदेवाडी कोर्टाचा मोठा निर्णय

मिळालेल्या माहितीनुसार, रहेजा बिल्डरकडे काम करणाऱ्या राहुल जाधव या तरुणासोबत कथित मारहाण करण्यात आल्याचा तसेच त्याला जातिसूचक शब्दांचा वापर करून अपमानित करण्यात आल्याचा गंभीर आरोप समोर आला होता. या प्रकरणी बिल्डर सुशील रहेजा यांच्याविरोधात अ‍ॅट्रॉसिटी कायद्यानुसार गुन्हा दाखल करण्यात आला आहे. मात्र, गुन्हा दाखल होऊनही अनेक दिवस उलटून गेल्यानंतरही पोलिसांनी संबंधित बिल्डरला अटक न केल्यामुळे वंचित बहुजन आघाडीच्या कार्यकर्त्यांमध्ये तीव्र नाराजी पसरली होती.

हेही वाचा : 'महात्मा फुले यांच्या पुतळ्याच्या विटंबनामागे RSS', प्रकाश आंबेडकरांचा संताप, भुजबळांनी अमित शाहांना लिहिलं पत्र

या नाराजीचा उद्रेक होत VBA च्या कार्यकर्त्यांनी चेंबूर येथील रहेजा बिल्डरच्या कार्यालयात घुसून तोडफोड केली. या घटनेदरम्यान संतप्त कार्यकर्त्यांनी बिल्डरच्या कार्यालयाची तोडफोडकेली. समोर आलेल्या व्हिडीओमध्ये कार्यकर्ते बिल्डरच्या कार्यालयाची तोडफोड करताना दिसून येत आहेत. या घटनेनंतर पोलिसांनी तातडीची कारवाई करत वंचित महिला आघाडीच्या मुंबई प्रदेशाध्यक्ष स्नेहल सोहनी, युवा आघाडीचे सागर गवई यांच्यासह अन्य कार्यकर्त्यांविरोधात विविध कलमान्वये गुन्हा दाखल केला आणि त्यांना ताब्यात घेतले होते. या अटकेनंतर VBA कडून तीव्र प्रतिक्रिया व्यक्त करण्यात आली होती. कार्यकर्त्यांची अटक अन्यायकारक असल्याचा दावा करत पक्षाने न्यायालयात धाव घेतली होती. अखेर शिंदेवाडी न्यायालयाने या प्रकरणाची सुनावणी करत सर्व आरोपींची अटक बेकायदेशीर ठरवली आणि त्यांची मुक्तता करण्याचे आदेश दिले.

दरम्यान, वंचित बहुजन आघाडीने आपली भूमिका पुन्हा एकदा स्पष्ट केली आहे. पक्षाकडून सांगण्यात आले आहे की, पीडित राहुल जाधव यांना जोपर्यंत न्याय मिळत नाही आणि आरोपी बिल्डरला अटक केली जात नाही, तोपर्यंत त्यांचा लढा आणि आंदोलन सुरूच राहणार आहे. या प्रकरणामुळे मुंबईतील राजकीय आणि सामाजिक वातावरणात खळबळ उडाली असून पुढील घडामोडींवर सर्वांचे लक्ष लागून राहिले आहे.

इतर महत्त्वाच्या बातम्या 

राष्ट्रीय स्वयंसेवक संघाच्या शताब्दी वर्षानिमित्त खास व्याख्यानमाला, मोहन भागवत काय काय म्हणाले?