वसंत मोरे, प्रतिनिधी, बारामती
ADVERTISEMENT
दक्षिण आफ्रिकेत पार पडलेल्या आयर्नमॅन स्पर्धेत बारामतीतल्या अभिषेक सतीश ननवरे या युवकाने देशातला सर्वात युवा आयर्नमॅन हा किताब मिळवला आहे. त्याने आयर्नमॅन स्पर्धेतील टास्क निर्धारित वेळेपेक्षा कमी कालावधीत पूर्ण करत नव्या विक्रमाची नोंद केली आहे. ग्रामीण भारतातील सर्वाधिक कमी वयाचा आयर्नमॅन होण्याचा विक्रम अभिषेकने वयाच्या 18 व्या वर्षी केला आहे.
आयर्नमॅन ही स्पर्धा जागतिक पातळीवर घेतली जाते. विविध देशातील स्पर्धक यामध्ये सहभागी होत असतात. अभिषेकने निर्धारित केलेल्या 17 तासांच्या वेळेपेक्षा 13 तास 33 मिनिटांपेक्षा कमी वेळेत ही स्पर्धा पूर्ण करत ‘आयर्नमॅन’ हा जगविख्यात मानला जाणारा मानाचा किताब मिळविला आहे. अभिषेक याने यासाठी मागील दीड वर्षांपासून तयारी सुरू केली होती. सायकलिंग आणि पोहण्याच्या सरावाबरोबरच योग्य पद्धतीचा डाएट देखील त्याला पाळवा लागला होता.
बारामतीचे पहिले आयर्नमॅन तसेच जागतिक पातळीवर तीनदा आयर्नमॅन झालेले सतीश ननवरे हे अभिषेकचे वडील आहेत. आपल्या पित्याकडून प्रेरणा घेत त्यांचेच मार्गदर्शन घेत अभिषेकने हे यश मिळवले आहे. दक्षिण आफ्रिकेतील पोर्ट एलिझाबेथ येथे ही स्पर्धा पार पडली. 180 किलोमीटर सायकलिंग, 42.2 किलोमीटर धावणे आणि 3.8 कि.मी. समुद्रात पोहण्याचा टास्क या स्पर्धेत पूर्ण करावा लागतो. ही सर्व आव्हाने एकापाठोपाठ कोणतीही विश्रांती न घेता पूर्ण करायची असतात. यासाठी स्पर्धकांच्या शारिरीक क्षमतेचा कस लागतो. जागतिक स्तरावरील व्यावसायिक स्पर्धक यात सहभागी होतात. मात्र, जिद्दीच्या बळावर अभिषेक ने हे आव्हान यशस्वीपणे पेलले.
उत्तम वेळेची कामगिरी नोंदवत त्याने भारतातील ग्रामीण भागातील सर्वात युवा आयर्नमॅन बनण्याची कामगिरी करुन दाखवली. बारामतीतल्या तुळजाराम चतुरचंद महाविद्यालयात शिक्षण घेत आहे. अभिषेक हा एक व्यावसायिक असून त्याची स्वता:ची सायकल ट्रेडिंग कंपनी आहे. सायकलिंगला प्रोत्साहन मिळावे आणि युवकांची तब्बेत अधिक सुदृढ ठेवण्याचा सल्ला अभिषेक याने युवकांना दिला आहे.
ADVERTISEMENT