मुंबई : लोकलमध्ये किरकोळ वाद, तरण्याबांड मुलाचा खून, आईने हंबरडा फोडला

लोकलच्या फर्स्ट क्लास कोचमध्ये तरुणाचा मर्डर 

प्राथमिक माहितीनुसार, मयंक लोहार आणि आरोपी दोघेही अंधेरी स्थानकावरून लोकलच्या प्रथम श्रेणी डब्यात चढले होते. त्या वेळी मुसळधार पाऊस सुरू होता. डब्याचा दरवाजा बंद करण्याच्या मुद्द्यावरून दोघांमध्ये वाद सुरू झाला. सुरुवातीला शाब्दिक बाचाबाची झाली; मात्र काही क्षणांतच परिस्थिती चिघळली आणि दोघांमध्ये झटापट झाली. या झटापटीदरम्यान आरोपीने मयंकच्या पोटात चाकू खुपसल्याचा आरोप आहे. गंभीर जखमी झालेला मयंक डब्यातच कोसळला.

हेही वाचा : कुटुंबियांचा विरोध झुगारुन प्रेमविवाह, 7 महिन्यांच्या बाळाला घेऊन गावात आले, अन् गेम झाला!

रुग्णालयात दाखल करण्यापूर्वीच तरुणाचा मृत्यू 

रात्री 11.04 वाजता लोकल बोरीवली स्थानकात पोहोचताच रेल्वे सुरक्षा दल, सरकारी रेल्वे पोलीस आणि वैद्यकीय पथक घटनास्थळी दाखल झाले. रात्री 11.07 वाजता सुरक्षा कर्मचारी संबंधित डब्यात पोहोचले आणि स्ट्रेचर तसेच वैद्यकीय मदतीची व्यवस्था करण्यात आली. रात्री 11.12 वाजता जखमी युवकाला डब्यातून बाहेर काढून आपत्कालीन उपचारासाठी नेण्यात आले. मात्र रात्री 11.22 वाजता आपत्कालीन वैद्यकीय कक्षातील डॉक्टरांनी तपासणीनंतर त्याला मृत घोषित केले. त्यानंतर रात्री 11.42 वाजता मृतदेह रुग्णवाहिकेतून कांदिवली येथील शताब्दी रुग्णालयात पाठवण्यात आला.

हेही वाचा : निधीचं सत्य मांडलेल्या 'मुंबई Tak' चं नाव घेतलं; ओमराजे निंबाळकर तात्काळ कॅमेऱ्यासमोर आले अन्...

पश्चिम रेल्वेच्या माहितीनुसार, आरोपीने बोरीवली स्थानकावरील प्लॅटफॉर्म क्रमांक 6 वर ट्रेन पूर्ण थांबण्यापूर्वीच उडी मारून पळ काढला. या प्रकरणाचा तपास सरकारी रेल्वे पोलिसांकडून सुरू असून, सीसीटीव्ही फुटेज आणि इतर महत्त्वाचे पुरावे तातडीने सुरक्षित करून तपास यंत्रणांकडे सुपूर्द करण्यात आले आहेत. घटनेची माहिती मिळताच पश्चिम रेल्वेचे वरिष्ठ अधिकारीही बोरीवली स्थानकात पोहोचले आणि संपूर्ण प्रकरणाचा आढावा घेतला. रेल्वे प्रशासनाने तपास यंत्रणांना पूर्ण सहकार्य करण्याची भूमिका घेतली असून प्रवाशांच्या सुरक्षेबाबत कटिबद्ध असल्याचे म्हटले आहे. आरोपीचा शोध घेण्यासाठी पोलिसांची पथके विविध ठिकाणी तपास करत आहेत. पुढील माहिती तपास पूर्ण झाल्यानंतर समोर येणार आहे.