IPL 2024: दिल्ली कॅपिटल्सच्या 'त्या' स्वस्त खेळाडूने लखनौला पछाडलं, खेळली जबरदस्त खेळी!

Who is Jake Fraser-McGurk : दिल्ली कॅपिटल्सचा (DC) युवा खेळाडू जेक फ्रेझर मॅकगर्क (Jake Fraser-McGurk) मूळचा ऑस्ट्रेलियाचा असून तो अवघ्या 22 वर्षांचा आहे. कर्णधार ऋषभ पंतच्या नेतृत्वाखाली जेक फ्रेझरला दिल्ली कॅपिटल्सने स्वस्तात विकत घेतलं आहे. दुखापतग्रस्त लुंगी एनगिडीची बदली म्हणून तो संघात सामील झाला आहे. (IPL 2024 Delhi Capitals cheap player Jake Fraser McGurk plays a stunning inning against Lucknow Super Giants)

फ्रेझरला दिल्ली कॅपिटल्सच्या बेस प्राइजमध्ये म्हणजेच 50 लाख रुपयांमध्ये खरेदी करण्यात आलं आहे. 12 एप्रिल रोजी लखनऊ विरुद्धच्या IPL डेब्यू सामन्यात, जेक फ्रेजर-मॅकगर्कने आपल्या जबरदस्त खेळीने सर्वांनाच हैराण केलं. त्याने दाखवून दिलं आहे की तो एक तो मोठ्या मंचावरील खेळाडू आहे. 

आयपीएलमधील पदार्पणाच्या सामन्यात फ्रेझरने 35 चेंडूत 55 धावांची खेळी खेळली, ज्यात पाच गगनचुंबी षटकार आणि दोन चौकारांचा समावेश होता. यासह फ्रेझरने कर्णधार ऋषभ पंतसोबत तिसऱ्या विकेटसाठी 77 धावांची भागीदारी केली, ज्यामुळे दिल्लीच्या विजयाचा रोडमॅप तयार झाला.

जेक फ्रेझर-मॅकगुर्क आहे तरी कोण?

जेक फ्रेझर-मॅकगर्कने यापूर्वी दुबई कॅपिटल्ससाठी ILT20 मध्ये तीन सामने खेळले होते. त्याने आपल्या तीन डावात 213.72 स्ट्राइक रेट आणि 54 च्या सर्वोत्तम धावसंख्येसह 109 धावा केल्या. दिल्ली कॅपिटल्सचे मुख्य प्रशिक्षक रिकी पाँटिंग यांनीही जेकचे कौतुक केले आहे.

11 एप्रिल 2002 रोजी जन्मलेला फ्रेझर लेग ब्रेक गुगली गोलंदाजीही करतो. त्याने ऑस्ट्रेलियासाठी 2 एकदिवसीय आंतरराष्ट्रीय सामने खेळले आहेत, ज्यात त्याच्या नावावर 51 धावा आहेत. जानेवारी 2024 मध्ये, त्याने वेस्ट इंडिजविरुद्धच्या एकदिवसीय सीरीजमध्ये पदार्पण केले. तर जेक फ्रेझरने 16 फर्स्ट क्लास सामन्यांमध्ये 550 धावा केल्या आहेत. त्याच्या नावावर 21 लिस्ट ए सामन्यात 525 धावा आहेत. त्याने 38 T-20 सामन्यात 700 धावा केल्या आहेत.

IPL पदार्पणातील सर्वोच्च धावसंख्या (दिल्ली कॅपिटल्स)

• 58- गौतम गंभीर विरुद्ध राजस्थान रॉयल्स, दिल्ली, 2008
• 55 - जेक फ्रेझर-मॅकगर्क विरुद्ध लखनौ सुपर जायंट्स, लखनौ, 2024
• 54 - सॅम बिलिंग्स विरुद्ध कोलकाता नाइट रायडर्स, दिल्ली, 2016
• 53 - पॉल कॉलिंगवुड विरुद्ध कोलकाता नाइट रायडर्स, दिल्ली, 2010
• 52- शिखर धवन विरुद्ध राजस्थान रॉयल्स, दिल्ली, 2008

लखनौ सुपर जायंट्स विरुद्ध दिल्ली कॅपिटल्स सामन्याचे हायलाइट्स

12 एप्रिल रोजी झालेल्या सामन्यात 'प्लेअर ऑफ द मॅच' कुलदीप यादव दिल्ली कॅपिटल्सच्या विजयाचा हिरो ठरला. पण ऑस्ट्रेलियन खेळाडू जेक फ्रेझर-मॅकगर्कच्या कामगिरीनेही सर्वांचे लक्ष वेधून घेतले. आयपीएलचा पदार्पण सामना खेळणाऱ्या जेकने 35 चेंडूत 55 धावांची खेळी खेळली. जेक आणि कर्णधार ऋषभ पंत यांच्यात तिसऱ्या विकेटसाठी 77 धावांची भागीदारी झाली. पंतने 24 चेंडूत 4 चौकार आणि दोन षटकारांसह 41 धावा केल्या. पृथ्वी शॉनेही 32 धावांची खेळी खेळली. लखनौ संघाकडून रवी बिश्नोई हा सर्वात यशस्वी गोलंदाज ठरला, त्याने 2 विकेट घेतले.

त्यापूर्वी, लखनौ जायंट्सने 167/7 धावा केल्या. लखनौकडून आयुष बडोनीने 55 धावांची नाबाद खेळी खेळली. एकावेळी लखनौने अवघ्या 94 धावांत सात विकेट गमावल्या होत्या. कर्णधार केएल राहुलनेही 39 धावांचे तर क्विंटन डी कॉकने 19 धावांचे योगदान दिले. दिल्लीच्या 'प्लेअर ऑफ द मॅच' कुलदीप यादवने सर्वाधिक तीन विकेट घेतल्या. तर, खलील अहमदने दोन गडी बाद केले.