जीवापेक्षा पैसा महत्त्वाचा? भाजप आमदाराच्या PA च्या पत्नीचा मृत्यू, पुण्यातील दीनानाथ मंगेशकर हॉस्पिटलवर गंभीर आरोप

काय आहे प्रकरण?

सुशांत भिसे यांची पत्नी मोनाली (तनिषा) भिसे या सात महिन्यांच्या गर्भवती होत्या. 30 मार्च रोजी त्यांची प्रकृती अचानक खालावली आणि त्यांना तातडीने उपचारांची गरज भासली. कुटुंबीयांनी त्यांना पुण्यातील दीनानाथ मंगेशकर हॉस्पिटलमध्ये दाखल करण्याचा प्रयत्न केला. मात्र, हॉस्पिटल प्रशासनाने त्यांना दाखल करून घेण्यासाठी प्रथम 10 लाख रुपये जमा करण्याची अट घातल्याचा आरोप कुटुंबीयांनी केला आहे. ही रक्कम जमा करणे शक्य न झाल्याने मोनाली यांना दाखल करून घेण्यास नकार देण्यात आला.

हे ही वाचा>> वृद्ध ब्राह्मण व्यक्तीवर अंत्यसंस्कार करणारे जावेद खान आहेत तरी कोण?, पुण्यात जोरदार चर्चा

या नकारानंतर कुटुंबीयांनी मोनाली यांना पिंपरी-चिंचवडमधील एका खासगी रुग्णालयात दाखल केले. तिथे त्यांनी दोन जुळ्या मुलींना जन्म दिला. परंतु, प्रसूतीनंतर अतिरक्तस्रावामुळे त्यांची प्रकृती आणखी बिघडली आणि अखेर 31 मार्च रोजी त्यांचा मृत्यू झाला. या घटनेने भिसे कुटुंबावर दुःखाचा डोंगर कोसळला आहे.

भाजप आमदार अमित गोरखेंचे आरोप

भाजप आमदार अमित गोरखे यांनी माध्यमांशी संवाद साधताना दीनानाथ मंगेशकर हॉस्पिटलवर गंभीर टीका केली. ते म्हणाले, "हॉस्पिटलने 10 लाख रुपये जमा करण्याची मागणी केली, अन्यथा उपचार सुरू करणार नाही, अशी भूमिका घेतली. मोनाली यांची प्रकृती चिंताजनक असताना त्यांना तिथे दोन ते तीन तास ठेवण्यात आले, पण दाखल करून घेण्यात आले नाही. जर हॉस्पिटलने वेळीच उपचार सुरू केले असते, तर आज त्या जिवंत असत्या." गोरखे यांनी हॉस्पिटलच्या या मुजोर आणि अमानवीय वर्तनाला जबाबदार धरले आहे.