कल्याणमध्ये कोरोना पॉझिटिव्ह महिलेचा मृत्यू, महाराष्ट्रात सापडले 'एवढे' रुग्ण

मुंबई, पुणे आणि ठाण्यानंतर आता कल्याण-डोंबिवली महानगरपालिका क्षेत्रात कोरोनाचे रुग्ण वाढत असताना, कल्याणमध्ये एका 47 वर्षीय महिलेचा कोरोना संसर्गामुळे मृत्यू झाल्याने आता संपूर्ण प्रशासन अलर्ट मोडवर गेलं आहे.

हे ही वाचा>> Covid News : कोरोना मृतांच्या संख्येत वाढ, ठाण्यात 21 वर्षीय रुग्णाचा मृत्यू

दरम्यान, ही परिस्थिती लक्षात घेता, केडीएमसी प्रशासन सतर्क झाले असून कल्याणमधील रुक्मिणीबाई रुग्णालयात 10 खाटांचे कोविड सेंटर सुरू करण्यात आले आहे. तर डोंबिवलीतील शास्त्रीनगर रुग्णालयात कोविड सोल्युशन सेंटर सुरू करण्यात आले आहे. नागरिकांनी घाबरू नये, तर कोविड काळात घेतलेल्या सर्व खबरदारी पुन्हा स्वीकारा आणि आवश्यक आरोग्य नियमांचे पालन करा, असे आवाहन नगरपालिका अधिकारी प्रसाद बोरकर यांनी केले आहे.

महाराष्ट्रात पुन्हा एकदा कोविड-19 च्या रुग्णसंख्येत वाढ होताना दिसत आहे. सोमवार (26 मे 2025) राज्यात कोविड-19 च्या 56 नवीन रुग्णांची नोंद झाली असून, यामुळे राज्यातील सक्रिय रुग्णांची संख्या 210 वर पोहोचली आहे, अशी माहिती राज्य आरोग्य विभागाने दिली आहे. यापैकी मुंबईत सर्वाधिक 35 नवीन रुग्ण आढळले आहेत, तर पुण्यात 8 नवीन रुग्णांची नोंद झाली आहे.