कोल्हापूर : पतीच्या खूनासाठी पत्नीची 5 जणांना सुपारी, बॉडी पोत्यात भरुन नदीत फेकली, पुरावेही साफ पण नंबर प्लेटने गेम

दरम्यान, 25 जुलैला पत्नीने करवीर पोलिस ठाण्यात पती बेपत्ता असल्याची नोंद केली. दुसऱ्याच दिवशी निपाणी ग्रामीण पोलिसांना यमगर्णी नदीपात्रात एका पुरुषाचा मृतदेह आढळला. तो शामरावच असल्याचे नंतर स्पष्ट झाले. गळा आवळून खून झाल्याचे दिसत असतानाही प्रकरण आकस्मिक मृत्यू म्हणून नोंदले गेल्याने तपासात मोठी ढिलाई राहिली.

यानंतर 30 जुलैला तासगाव पोलिस गस्त घालत असताना भिलवडी नाका परिसरात संशयास्पद रित्या वावरणाऱ्या दुचाकीस्वाराला त्यांनी थांबवले. कागदपत्रांची मागणी केल्यावर त्याने उडवाउडवीची उत्तरे दिली. नंबर प्लेट तपासली असता ती बनावट असल्याचे स्पष्ट झाले. पोलिसांनी कडक चौकशी केली असता शेवटी त्याने दुचाकी कोल्हापूरमधील मित्राकडून आणल्याचे सांगितले. प्रत्यक्षात मूळ नंबर तपासल्यावर दुचाकी ही मृत शामरावची असल्याचे समोर आले. यातून खुनाचा धागा पोलिसांना मिळाला. खोलात जाऊन चौकशी केली असता त्या तरुणाने गुन्ह्याची कबुली दिली. गुडाळ येथे शामरावची हत्या करून त्याची दुचाकी ताब्यात घेतल्याचे त्याने मान्य केले. पुढील तपासात या कटाच्या मुळाशी शामरावची पत्नीचं असल्याचे उघड झाले. तिच्या सांगण्यावरूनच बहिणीच्या मुलाने आणि त्याच्या मित्रांनी खून घडवून आणला होता.

खुनात सहभागी झालेल्या पाचही तरुणांचे वय अवघे 20 ते 25 वर्षांच्या दरम्यान होते. डान्स ग्रुपमधून त्यांची ओळख झाली होती. चुकीच्या संगतीत गेलेले हे तरुण पैशांच्या मोहात पडून संपूर्ण आयुष्य अंधारात ढकलून बसले. या प्रकरणाचा तपास तत्कालीन विशेष पोलिस महानिरीक्षक विश्वास नांगरे-पाटील, सांगली पोलिस अधीक्षक दत्तात्रय शिंदे, तासगावचे उपअधीक्षक कृष्णात पिंगळे यांच्या मार्गदर्शनाखाली झाला. उपनिरीक्षक प्रदीप चौधरी, कॉन्स्टेबल शैलेंद्र कोरवी, दरिबा बंडगर आणि योगेश यादव यांनी गुन्ह्याचा धांडोळा घेत आरोपींना गजाआड केले. विशेष म्हणजे, तासगाव पोलिसांनी बनावट नंबर प्लेटचा धागा पकडला नसता, तर हा खून कदाचित कायम रहस्यच राहिला असता. दुचाकीच्या तपासातून सुरु झालेला धागा थेट राधानगरीतल्या खुनापर्यंत पोहोचला आणि संपूर्ण कट उघडकीस आला.