कौटिल्य ॲकॅडमीची डील, तरुणीच्या बॉयफ्रेंडसह बापही अटकेत, MPSC पेपरफुटीची Inside Story

MPSC drug inspector recruitment paper leak : अन्न व औषध प्रशासन (एफडीए) विभागातील औषध निरीक्षक (गट-ब) पदाच्या भरती परीक्षेचा पेपर फुटल्याची पहिली तक्रार 23 मार्च रोजी एफडीएकडे करण्यात आली होती. मात्र, या तक्रारीकडे दुर्लक्ष झाल्याचे समोर आले आहे. त्यानंतर 21 जुलै रोजी महाराष्ट्र लोकसेवा आयोगाकडे (एमपीएससी) ई-मेलद्वारे पेपरफुटीची तक्रार करण्यात आली. त्यावेळीही पेपर फुटल्याचा आरोप नाकारण्यात आला. मात्र, मुंबई गुन्हे शाखेच्या तपासात तब्बल 155 दिवसांनी पेपरफुटी झाल्याचे निदर्शनास आले. या प्रकरणी एमपीएससीचा अवर सचिव अभिजित लेंडवे, दोन सहायक कक्ष अधिकारी गोपाळ मराठे आणि विश्वेश्वर नकाते यांच्यासह सहा जणांना अटक करण्यात आली आहे. नंदुरबारच्या कौटिल्य अकॅडमीचा संचालक प्रवीण पाटील, पेपर खरेदी करणाऱ्या विद्यार्थिनी ऋतुजा पाटीलचे वडील अमृत पाटील आणि तक्रारदार गौरव पाटील यांचाही अटकेतील आरोपींमध्ये समावेश आहे.