पुणे: NCP चे आमदार म्हणतात, 'रस्ते आहेत तर अपघात होणारच...' प्रश्न विचारणाऱ्या पत्रकारवरच चिडले
पुण्यात खराब रस्त्यामुळे चिमुकल्याचा डंपरखाली येऊन मृत्यू झाला. यावर प्रश्न विचारताच NCP आमदार शंकर मांडेकर पत्रकारावर संतापले तसंच ‘रस्ते आहेत तर अपघात होणारच’ असं असंवेदनशील वक्तव्यही त्यांनी केलं.
ADVERTISEMENT
पुणे: पुणे जिल्ह्यातील खराब रस्त्यामुळे एका चिमुकल्याचा डंपरखाली येऊन मृत्यू झाल्याची दुर्दैवी घटना समोर आली आहे. या घटनेनंतर परिसरातील नागरिकांमध्ये तीव्र संताप असून, रस्त्यांच्या दुरवस्थेला जबाबदार कोण, असा सवाल उपस्थित केला जात आहे. याच पार्श्वभूमीवर पत्रकाराने प्रश्न विचारल्यानंतर राष्ट्रवादी काँग्रेसचे आमदार शंकर मांडेकर संतापल्याचे समोर आले आहे. विशेष म्हणजे, रस्त्यांवर अपघात होण्याबाबत बोलताना त्यांनी ‘रस्ते आहेत तर अपघात होणारच’ अशा आशयाचे वक्तव्य केले.
नेमकी घटना काय?
खराब आणि चिखलमय रस्त्यावरून वाहनांची वाहतूक सुरू असताना एका चिमुकल्याचा डंपरखाली येऊन दुर्दैवी मृत्यू झाला. या घटनेनंतर स्थानिक नागरिकांनी रस्त्यांची दुरवस्था, जड वाहनांची वाहतूक आणि प्रशासनाच्या भूमिकेवर प्रश्न उपस्थित केले.
या घटनेत डंपर चालकाविरोधात कारवाई करण्यात आली आहे. मात्र, केवळ वाहनचालकावर कारवाई करून प्रश्न सुटणार नाही, तर खराब रस्त्यांसाठी जबाबदार असलेल्या प्रशासन आणि लोकप्रतिनिधींवरही जबाबदारी निश्चित करावी, अशी मागणी नागरिकांकडून केली जात आहे.
‘लोकप्रतिनिधी काम करत नाहीत’ हा आरोप चुकीचा असल्याचा दावा
या प्रश्नावर बोलताना आमदार शंकर मांडेकर यांनी रस्त्याच्या समस्येची पार्श्वभूमी स्पष्ट केली. संबंधित रस्ता पूर्वी सार्वजनिक बांधकाम विभागाच्या अखत्यारित होता आणि त्याच्या दुरुस्तीचे काम आपण केले असल्याचा दावा त्यांनी केला.