वडील फुटपाथवर बॅग विकतात, मुलाचं NEET परीक्षेत यश; ओमची ह्रदयस्पर्शी कहाणी
Success Story : फुटपाथवर बॅग विकून कुटुंबाचा उदरनिर्वाह करणाऱ्या वडिलांच्या मुलाने NEET परीक्षा उत्तीर्ण होत डॉक्टर होण्याच्या स्वप्नाला नवी दिशा दिली. ओम चौकसेचा संघर्ष, मेहनत आणि जिद्दीचे सर्वांकडून कौतुक होत आहे.
ADVERTISEMENT
बातम्या हायलाइट
वडील फुटपाथवर बॅग विकतात
मुलाचं NEET परीक्षेत यश; ओमची ह्रदयस्पर्शी कहाणी
Success Story : जबलपूरमध्ये फुटपाथवर शाळेच्या बॅगा विकून कुटुंबाचा उदरनिर्वाह करणाऱ्या रमेश चौकसे यांच्या मुलाने आपल्या मेहनतीच्या बळावर डॉक्टर होण्याच्या स्वप्नाला नवी दिशा दिली आहे. ओम चौकसेने NEET परीक्षा उत्तीर्ण करत मोठे यश मिळवले असून त्याच्या यशामागे केवळ अभ्यास नाही, तर अनेक वर्षांचा संघर्ष, शिस्त आणि कुटुंबाची साथ दडलेली आहे. जबलपूरमधील मॉडेल हाय सेकंडरी स्कूलच्या बाहेर फुटपाथवर रमेश चौकसे यांचे छोटे दुकान आहे. रंगीबेरंगी शाळेच्या बॅगांनी सजलेल्या त्या दुकानासमोरच ओमचे शिक्षण झाले. दररोज शाळेत जाण्यापूर्वी तो वडिलांना दुकान लावण्यासाठी मदत करत असे. बॅगा मांडणे, सामान व्यवस्थित लावणे ही कामे पूर्ण करून तो शाळेत जात असे. संध्याकाळी शाळा सुटल्यानंतर पुन्हा दुकानात येऊन वडिलांसोबत दुकान आवरण्याचे काम करत आणि त्यानंतर घरी जाऊन अभ्यासाला बसत असे. हीच त्याची रोजची दिनचर्या होती.
हेही वाचा : राम मंदिरातील चोरीबाबत राहुल गांधींचं पीएम मोदींना पत्र, नेमंक काय म्हणाले?
दहावीच्या बोर्ड परीक्षेत मध्य प्रदेशात मिळवलेला सातवा क्रमांक
ओम आर्थिकदृष्ट्या सक्षम कुटुंबातून आलेला नाही. घरातील परिस्थिती अशी होती की रोजच्या कमाईवरच पुढच्या दिवसाचा खर्च भागत असे. वडिलांच्या फुटपाथवरील बॅग विक्रीतूनच घराचा खर्च आणि मुलांचे शिक्षण चालत होते. मात्र या परिस्थितीने ओमच्या स्वप्नांवर कधीही मर्यादा आणल्या नाहीत. लहानपणापासूनच तो अभ्यासात हुशार होता. दहावीच्या बोर्ड परीक्षेत त्याने संपूर्ण मध्य प्रदेशात सातवा क्रमांक मिळवला. त्यानंतर बारावीच्या परीक्षेतही तो राज्यातील अव्वल दहा विद्यार्थ्यांमध्ये स्थान मिळवण्यात यशस्वी ठरला. त्याच्या मेहनतीचे आणि अभ्यासातील सातत्याचे कौतुक शिक्षकही करत असत. दरम्यान, काही वर्षांपूर्वी हृदयविकाराच्या झटक्याने त्याच्या आजीचे निधन झाले. या घटनेने ओमच्या आयुष्याला वेगळी दिशा दिली. त्याने मनाशी ठरवले की आपण डॉक्टर व्हायचे आणि रुग्णांना उत्तम उपचार मिळावेत यासाठी काम करायचे. याच निर्धाराने त्याच्या संघर्षाला नवे बळ दिले.
हेही वाचा : "त्यांना ब्लड प्रेशरचा त्रास, कृपया ...", अभिजीत दिपकेंचं आई-वडिलांबाबत सर्वांना महत्त्वाचं आवाहन
