अल-निनो असतानाही एवढा पाऊस का पडतोय? महाराष्ट्रात अचानक पावसाचा कहर
Heavy Rain after El Nino effect: मुंबई, कोकण आणि पश्चिम महाराष्ट्रात अचानक मुसळधार पावसाचा कहर पाहायला मिळत आहे. एकीकडे अल-निनोचा प्रभाव असतानाही पावसाचा जोर का वाढला? याविषयी आता सातत्याने विचारलं जात आहे.
ADVERTISEMENT
बातम्या हायलाइट
बंगालच्या उपसागरातील प्रणाली सक्रिय
मान्सून आणि पश्चिम किनारपट्टीवर दमदार वारे
बंगालच्या उपसागरातील कमी दाबाच्या पट्ट्यामुळे महाराष्ट्रात मुसळधार पाऊस
मुंबई: गेल्या तीन दिवसांपासून मुंबई, ठाणे, पालघर, रायगड, रत्नागिरी, सिंधुदुर्ग तसेच पुणे, सातारा, कोल्हापूर आणि पश्चिम महाराष्ट्रातील अनेक भागांत मुसळधार ते अतिमुसळधार पाऊस सुरू आहे. अनेक ठिकाणी पूरस्थिती निर्माण झाली असून, घाटमाथ्यावर दरडी कोसळण्याच्या घटनाही घडल्या आहेत. मुंबई–पुणे रेल्वे आणि रस्ते वाहतुकीवरही त्याचा मोठा परिणाम झाला आहे.
दरम्यान, यंदा अल-निनोचा प्रभाव राहण्याची शक्यता व्यक्त केली जात असताना एवढा जोरदार पाऊस कसा पडतोय?, असा प्रश्न अनेकांना पडला आहे. हवामान तज्ज्ञांच्या मते, यामागे अनेक हवामान घटक एकाच वेळी सक्रिय झाल्याने ही परिस्थिती निर्माण झाली आहे.
अल-निनो म्हणजे पाऊसच पडणार नाही, असा अर्थ नाही. सर्वप्रथम एक गैरसमज दूर करणे गरजेचे आहे. अल-निनो म्हणजे भारतात पाऊस पडणारच नाही, असे नसते.
अल-निनो हा प्रशांत महासागरातील समुद्राच्या पृष्ठभागाचे तापमान वाढण्याशी संबंधित जागतिक हवामानाचा प्रकार आहे. यामुळे संपूर्ण मान्सून हंगामातील सरासरी पर्जन्यमानावर परिणाम होऊ शकतो, मात्र प्रत्येक आठवडा किंवा प्रत्येक राज्यातील पावसाचे स्वरूप तो ठरवत नाही.
